DILI, STLTIMORLESTE.com – Prizaun tolu (3) iha Timor hanesan Prizaun Bekora, Prizaun Suai no Prizaun Gleno akomula dadur hamutuk 693.
Diretor Nasional Servisu Prizional no Reinsersaun Sosial, Delfio Soares Alves dehan, Prizaun tolu akomula dadur hamutuk 693.
“Dadur prizaun tolu nee agora hamutuk 693, iha Prizaun Bekora hamutuk 463, Prizaun Gleno 105 no prizaun Suai hamutuk 125,” dehan Delfio ba STL iha Dili, Segunda (03/07/2026).
Nia esplika, iha prizaun Gleno akumula dadur feto no mos dadur mane, iha dadur feto hamutuk 24, restu husi numeru nee dadur mane hotu, maibe iha Prizaun Bekora no Prizaun Suai akumula deit dadur mane sira.
Nia argumenta, dadur feto sira neebe iha Prizaun Gleno iha mos labarik nain tolu hela iha Prizaun laran, hamutuk ho sira nia inan.
“Iha labarik nain tolu iha neeba hamutuk ho sira nia inan, too sira halo idade tinan tolu sira tenke ba hela ho familia ka entrega ba Governu tau iha uma Mahon ka depende ba sira nia inan,” dehan Delfio.
Diretor nee sublina, labarik tinan tolu tenke sai ona husi Prizaun, labele hela ho sira nia inan tanba impaktu pisikolojia labarik nian.
Akresenta tan, dadur estranjeiru iha Prizaun Bekora hamutuk nain 39, no espasu ba dadur sira iha Prizaun Bekora oras nee daudaun diak hela, tanba iha espasu.
Reforsa, oras nee daudaun iha Guarda Prizional hamutuk 305, numeru neebe iha bele dehan sufisiente ona, maibe ba iha futuru presiza halo tan rekrutamentu hodi apoiu servisu ba iha Prizaun sira.
Delfio profunda, konaba transporte sira sufisiente hela, tanba nee halao servisu tuir kbiit neebe governu iha, no difikuldade neebe iha halo sai fali progresu.
Iha sorin seluk, Diretor Prizaun Suai, Rui Gonsalves dehan, prizaun Suai oras nee daudaun akumula dadur hamutuk 125.
“Iha Suai akumula dadur hamutuk 125, husi numeru nee iha kondenadu 112 no iha prizaun Preventiva nain 13,” dehan nia.
Nia hatutan, Prizaun Suai seidauk iha fatin atu akumula dadur feto sira, tanba nee Prizaun Suai oras nee daudaun sei akumula deit dadur mane sira.
Esplika tan, Prizaun Suai ho nia sela sanulu resin lima, inklui Guarda Prizional nain 53, no iha Guarda nain rua mak ida ba kontinua Estudu, ida halo tratamentu, hela nain 51.
Reforsa, konaba transporte sira la iha difikuldade ona, tanba iha transporte hodi apoiu sira halao servisu.
Aleinde nee Diretor Prizaun Gleno, Luis Sarmento reforsa, oras nee daudaun Prizaun Gleno akumula ona dadur hamutuk 105, neebe kompostu husi dadur feto no mos dadur mane.
(ter)
