DILI, STLTIMORLESTE.com – Dadur neebe akomula iha Prizaun Suai, sira mos iha atividade produsaun produtivu batako iha prizaun laran, hanesan parte ida prepara sira atu sira reintegra ba iha familia, sira mos bele kria rasik servisu.
Tuir Diretor Nasional Servisu Prizional no Reinsersaun Sosial, Delfio Soares Alves katak, produs batako hanesan parte ida tama iha atividade dadur sira nian.
“Nee parte ida produsaun produtivu batako, sira produs hotu balu husi komunidade sira husi liur mak sosa fali, iha mos kompanhia balu ba hola iha neeba, depois hola tiha porsentu balu asegura ba sira nian, porsentu balu tama fali ba iha kofre estadu,”.dehan nia ba STL iha Dili, Kuarta (05/08/2026).
Tuir Delfio, porsentu neebe iha balu ba dadur sira atu aban bainrua sira sai bele lori fali porsentu nee, sira iha nesesidade familia ruma presiza selu oan nia eskola, sosa farda ka livru ruma, bele uza ida nee, tanba nee tulun sira liu husi formasaun produtivu.
Iha sorin seluk Diretor Prizaun Suai, Rui Gonsalves dehan, atividade iha Prizaun laran mak kursu lian Ingles, karpinteru, formasaun sira seluk inklui mos produs batako.
“Atividade ida nee kontinua lao, ho kursu lian Inglesh ho karpinteru kontinua lao iha Prizaun Suai,” dehan nia.
Nia hatutan, batako sira neebe produs nee husi ema liur mak sosa, tanba nee atividade kontinua lao.
Aleinde nee, Akademiku Sebastião Dos Santos dehan, dadur sira iha prizaun tenke kria atividade ba sira, atu sira sai husi Prizaun bele kria rasik servisu ba sira nia aan.
“Prizaun nee laos fatin kastigu ema maibe fatin ida neebe atu transforma ema nia aktu, tanba nee kria atividade sira atu bele prepara sira sai husi prizaun fokus ba atividade sira atu labele kria tan krime,” dehan nia.
(ter)
