DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu inisial DdS hanesan pesoal Polisia Sientifika Investigasaun Kriminal (PSIK), neebe deskonfia komete krime Obstrusaun Autoridade Publiku hasoru ofendidu inisial FGS hanesan mos pesoal PSIK.
Iha sala julgamentu laran, Juiz prosesu Ana Paula lee sai akuzasaun katak, momentu neeba ofendidu halao hela servisu iha edifisiu Polisia Sentifika Investigasaun Kriminal (PSIK).
Iha momentu neeba ofendidu simu mensajen husi arguidu liu husi Whatsapp ho lia fuan la diak.
Haree tiha mensajen nee, ofendidu informa kedan ba iha nia kolega ida atu kontrola arma no dezarma arma husi arguidu nia posse.
Liu tiha minutu balu, arguidu mos too ba iha edifisiu PSIk koalia ho lian makaas, bolu ofendidu atu tuku malu ho ofendidu no tafui kaben ba ofendidu.
Husi neeba arguidu no ofendidu la konsege tuku malu, tanba iha membru balu husi PSIK mak dada netik sira no ikus mai arguidu fila ba uma.
Konsekuensia husi arguidu nia hahalok nee halo ofendidu sente tauk no abandona servisu piketi.
Tanba nee, Ministeriu Publiku akuza arguidu hanesan autor material ba krime Obstrusaun Autoridade Publiku neebe previstu iha artigu 243 husi Kodigu Penal.
Hatan ba akuzasaun neebe iha, arguidu deklara katak, akuzasaun neebe iha lalos hotu.
Arguidu deklara, momentu neeba arguidu lori armas, tanba hetan autorizasaun tuir despaisu numeru 2/2 Fevereru autoriza arguidu hodi rai armas.
Arguidu deklara, momentu neeba arguidu la hatene ofendidu halao servisu turnu, tanba nee arguidu manda mensajen ba iha ofendidu hodi husu konaba ofendidu iha neebe. Depois ofendidu hatan ba arguidu katak, ofendidu halao hela servisu iha servisu fatin. No arguidu mos manda mensajen ba iha ofendidu, husu atu hamoos tiha posting estatus neebe ofendidu tau iha media sosial facebook, neebe ofendidu uza.
Arguidu deklara, ofendidu sempre posting status iha fim de semana bainhira hemu lanu, no estatus sira nee refere ba iha knaar balu PSIK nian, tanba ofendidu la aseita ho mudansa ba iha kargu balu. Tanba nee mak arguidu fo hanoin beibeik ba iha ofendidu atu labele posting status no tenke hamoos.
Arguidu deklara, liu husi mensajen ba malu entre arguidu no ofendidu mosu dezentendementu, tanba nee ofendidu mos dehan hein arguidu iha servisu fatin. Ho ida nee arguidu mos ba iha sira nia servisu fatin PSIK.
Arguidu rekonhese, momentu neeba arguidu lori duni pistola, maibe ho intensaun too iha edifisiu bele entrega tiha, maibe too iha edifisiu PSIK, arguidu haree ofendidu hamriik ona iha oin, tanba nee pistola arguidu tau hela iha kareta laran mak arguidu tun husi kareta ba koalia ho ofendidu.
Arguidu deklara, iha diskusaun nee arguidu ho ofendidu la konsege baku malu, tanba iha sira nia kolega PSIK balu neebe halo intervensaun. Husi nee arguidu mos deside fila ba uma.
Arguidu deklara, ofendidu kuandu ho kondisaun lanu iha fim semana, sempre tau status hodi publika facebook no status neebe ofendidu tau hatudu katak, ofendidu laos hanesan ema PSIK.
Arguidu deklara, la lori liman tuku ofendidu, maibe lori deit kaben mak tafui ba arguidu.
Arguidu deklara, ofendidu posting status tanba sente hirus, momentu neeba iha mudansa ba kargu, ofendidu la satisfaz halo publikasaun iha media sosial hodi insulta instituisaun. Ho ida nee arguidu fo hanoin ba iha ofendidu atu hamoos publikasaun ida nee, maibe ikus mai mosu dezintendimentu.
Arguidu rekonhese, ofendidu halao hela nia funsaun normal la iha perturbasaun, tanba ofendidu mak halo auto notisia no despaisu hasoru arguidu.
Aleinde nee, ofendidu deklara katak, momentu neeba ofendidu halao hela servisu piket, ofendidu simu mensajen husi arguidu ho lia fuan mal, no husu ofendidu atu baku malu, no mensajen manda liu husi Whatsapp. Depois arguidu telefone liu husi Whatsapp husu ofendidu nia paraderu, ofendidu mos hatan katak, nia halao hela servisu.
Ofendidu deklara, momentu neeba iha ofendidu no investigador nain rua sira mak halao hela turnu, maibe akontese tiha diskusaun nee ofendidu rasik mak halo auto notisia ho razaun tanba ofendidu hanesan Xefe ekipa investigador sira hanesan nia sub ordinariu.
Ofendidu rekonhese, sira nia status PSIK la proibe kuandu hasoru problema, nain rasik mak halo auto notisia hodi haruka ba iha Ministeriu Publiku.
Ofendidu esplika, arguidu ba iha PSIK lori ho armas, maibe armas arguidu tau tiha iha neebe ofendidu la haree, depois tun husi kareta arguidu bolu ofendidu atu baku malu, no arguidu direita tafui kaben ba iha ofendidu.
Ofendidu deklara, depois sira hases aan husi fatin nee, lao oituan ba iha kotuk, haree kolega PSIK balu mosu mai halo intervensaun, tanba nee sira fahe malu no arguidu mos fila. No momentu nee ofendidu abandona servisu, tanba nia tauk arguidu uza hela armas no ofendidu la uza armas ida.
Ofendidu rekonhese, ofendidu mak posting status iha media sosial facebook. Ofendidu deklara, nia posting status sira nee iha tempu livre, dala ruma iha fim de semana, ho razaun tanba iha mudansa ba kargu ho ida nee mak nia sente la diak hodi posting.
Ofendidu deklara, utiliza arma nee tenke hetan autorizasaun husi sira nia superior, labele utiliza deit. Konaba sira nia kolega ida halo pasa revista ba iha arguidu, ida nee ofendidu la haree no la hatene.
Ofendidu deklara, tuir sira nia lei anterior autoriza sira nain sia mak lori arma. Maibe depois halo tiha alterasaun, kuandu uza armas iha tempu neebe hetan mandadu buska ba buka suspeitu sira mak bele lori.
Ofendidu deklara, arguidu la uza arma impede nia servisu.
Rona tiha arguidu no ofendidu nia deklarasaun, Tribunal adia ba loron 14 fulan Julhu oras 11.00, hodi rona deklarasaun husi sasin.
Audensia julgamentu nee prezide husi Juiz Koletivu, Jose Maria, Ersilia de Jesus, Ana Paula, Ministeriu Publiku (MP) reprezenta husi Prokurador Aderito Tilman, arguidu hetan asistensia legal husi Defensor Publiku Fernando de Carvalho.
(ter)
