DILI, STLTIMORLESTE.com – Delegasaun parlamentár Alemaña louva Prezidente Repúblika, José Ramos-Horta, nia kompromisu atu promove pás, rekonsiliasaun no dezenvolvimentu ekonómiku Timor-Leste.
Membru Parlamentu Alemaña, Malte Kaufmann, hato’o apresiasaun ne’e durante audiénsia ho Prezidente Ramos-Horta iha Palásiu Prezidensiál Nicolau Lobato, Dili, Kinta-feira (22/10/2026).
“Prezidente Ramos-Horta hatudu kompromisu firme atu mantein pás nasionál no promove futuru ne’ebé prósperu ba Timor-Leste,” dehan Kaufmann.
Iha enkontru ne’e, parte rua diskute prosesu rekonsiliasaun pós-konflitu Timor-Leste nian no esforsu atu hametin estabilidade polítika, pás duradoura no dezenvolvimentu nasionál.
Kaufmann kompara prosesu rekonsiliasaun Timor-Leste nian ho esperiénsia rekonstrusaun istórika Europa nian hafoin Segunda Guerra Mundial.
Parte rua subliña katak esperiénsia diplomátika no rekonsiliasaun sai fundamentu importante atu hametin estabilidade, amizade no kooperasaun internasionál.
Kaufmann mós apresia estratéjia Ramos-Horta nian atu mantein pás nasionál nu’udar baze ba kriasaun empregu, kresimentu ekonómiku no oportunidade foun ba juventude.
Aleinde ne’e, enkontru aborda oportunidade atu hametin relasaun ekonómika bilaterál entre Timor-Leste no Alemaña, inklui atrasaun investimentu husi Europa.
Parte rua haree Europa nu’udar parseiru potensial atu apoia dezenvolvimentu ekonómiku Timor-Leste nian, liuliu iha kontestu integrasaun rejionál ASEAN.
Durante audiénsia, Ramos-Horta mós simu konvite atu partisipa iha selebrasaun Loron Unidade Alemaña, ne’ebé sei hala’o sexta-feira (23/10/2026).
Selebrasaun ne’e sei envolve Kaufmann, delegasaun parlamentár Alemaña no Embaixadór Alemaña.
Enkontru diplomátiku ne’e sai oportunidade atu hametin amizade, diálogu polítiku no kooperasaun duradoura entre Timor-Leste no Alemaña.
(eme)
