DILI, STLTIMORLESTE.com – Delegasaun husi Portugal ne’ebé sai membru Júri ba konkursu rekrutamentu no selesaun Juís Supremu Tribunal Justisa (STJ), halo vizita kortezia ho Prezidente Repúblika José Ramos-Horta.
Bainhira remata hasoru malu, Prezidente Komisaun Rekrutamentu no Selesaun Juís STJ, Avelino Coelho, hatete katak nia ho Komisáriu Pedro Camões akompaña membru Júri sira atu halo vizita kortezia no komprementa Prezidente Repúblika, la’ós atu ko’alia kona-ba konkursu rekrutamentu Juís.
“Ohin hau ho Komisáriu Pedro Camões ami rua akompaña Júri mai halo de’it vizita kortezia, mai komprementa Sua Excelénsia Prezidente Repúblika no troka hanoin oituan, maibé la’ós liga ho asuntu konkursu nian,” dehan Prezidente Avelino Coelho ba jornalista sira iha Palásiu Prezidensiál Nicolau Lobato, Kuarta (16/09/2026).
Avelino Coelho hatete katak, vizita kortezia ne’e la afeta imparsialidade membru Júri sira iha prosesu rekrutamentu no selesaun Juís STJ.
“Ida ne’e hanesan vizita kortezia atu garante nafatin imparsialidade prosesu ne’e tomak. Maibé nu’udar etika, ita tenke komplementa ita nia Xefe Estadu, tanba sira mai hanesan ita nia belun, apesar hala’o knaar nu’udar membru Júri ho responsabilidade boot ba prosesu ne’e tomak. Nu’udar ita nia sivizmu, ohin ami akompaña sira mai komplementa Sua Excelénsia Prezidente Repúblika,” dehan Avelino.
Iha enkontru ne’e, Prezidente Repúblika José Ramos-Horta hato’o nia agradese no apresiasaun ba vontade membru Júri sira ne’ebé aseita no partisipa iha prosesu rekrutamentu Juís STJ.
Prezidente Repúblika mos hato’o agradese ba Prezidente Supremu Tribunal Justisa Portugal, ne’ebé bazeia ba akordu ne’ebé iha, aseita membru Júri sira atu kontribui ho kredibilidade no esperiénsia iha prosesu ne’e.
Nia hatete katak, kontribuisaun membru Júri sira importante atu ajuda Timor-Leste estabelese Supremu Tribunal Justisa, no konsidera ida ne’e hanesan onra boot ida ba Timor-Leste.
Alende ne’e Prezidente Republika nomos Prezidente Komisaun Rekrutamentu no Selesaun Juís la fó rekomendasaun ruma kona-ba servisu Júri, tanba vizita ne’e hanesan vizita kortezia.
Nomos Prezidente Repúblika laiha rekomendasaun ruma liga ho servisu Júri nia, tanba Prezidente laiha kompeténsia atu fó rekomendasaun kona-ba konkursu ne’e. Tanba ne’e, sira mai hanesan vizita kortezia de’it. No Júri mai serbisu tuir sira nia konsiénsia atu asegura imparsialidade no haree ba rezultadu. Tanba ne’e, Prezidente Repúblika no Komisaun labele fó rekomendasaun ruma.
Prosesu rekrutamentu no selesaun Juís STJ sei hala’o tuir prinsipiu imparsialidade, responsabilidade no kredibilidade, ho membru Júri sira ne’ebé iha esperiénsia no kompeténsia iha área justisa.
(eme)
