DILI, STLTIMORLESTE.com – Liu husi komunikadu imprensia Media F-FDTL neebe STL asesu katak, ohin delegasaun husi Portugal, Indonézia no Repúblika Korea too ona iha Aeroportu Internasionál Nicolau Lobato, Dili, Timor Leste (TL), hodi partisipa iha serimonia selebrasaun Loron FALINTIL ba dala-51.
Delegasaun internasionál hirak nee too iha TL liu husi aviaun Citilink, iha kuadru preparasaun ba selebrasaun aniversariu 51.º FALINTIL, neebe sei halao iha loron 20 Agostu 2026, iha area Matebian, Postu Administrativu Kelikai, Munisípiu Baucau.
Selebrasaun Loron FALINTIL nee sai nuudar momentu importante atu fo omenajen no respeitu ba Mártir no Kombatente sira neebe kontribui ho sakrifísiu boot iha luta ba libertasaun no independénsia Timor Leste nian.
FALINTIL harii iha 20 Agostu 1975, no loron 20 Agostu rekoñese nuudar Loron FALINTIL. Ba selebrasaun tinan 2026, tema neebe promove mak “Honra ba Mártir sira”, Kompromisu ba Estabilidade no Dame”, ho atividade sentrál neebe sei halao iha area Matebian, Kelikai.
Depois prezensa delegasaun husi nasaun sira nee hatudu mos apoiu no solidariedade internasionál ba TL iha komemorasaun istorika ida nee, neebe fo enfaze ba memoria luta, unidade nasional, estabilidade no dame.
Entretantu delegasaun Indonézia nian nee Xefia husi Bridadeiru Jenerál Ketut Mertha Gunarda, Portugal nian Xefia husi Brigadeiru Jenerál Rui Pina no Repúblika Korea Kapitán (Navi) Sangil Lee.
Delegasaun sira simu husi Coronel Helder da Costa, neebe atual atual hanesan Komandante Komponente Aéreo F-FDTL, no Tenente Koronel Graduadu Eng. Domingos Oki, ne’ebé atual hanesan Xefe Divizaun Kooperasaun Tékniku Militár (CTM ).
(jen)
