DILI, STLTIMORLESTE.com – Relasiona ho karreta Tribunal nian ida neebe utiliza hodi treinu nia oan, oras nee sai viral iha media sosial, no Konselhu Superior Majislatura Judisial (KSMJ) sei haree ba ida nee, tanba lei vale ba ema hotu inklui Juiz sira.
“Lei nee vale ba hau mesmu nuudar Prezidente, vale ba Juiz sira hotu no vale ba se deit, no la iha tratamentu ida espesial ba ema ida la iha,” dehan Prezidente Tribunal Rekursu, Deolindo dos Santos ba jornalista sira iha Kaikoli, Dili, Segunda (03/01/2025).
PTR, Deolindo hatutan, kompetensia atu haree ba ida nee husi Konselhu Superior Majislatura Judisial (KSMJ) nian, no akontese ona sei hatoo ba Konselhu hodi halo prosesu averiguasaun, depois mak tama ba iha prosesu disiplinar mak foin deside.
Maibe nia parte mak sei deside plenariu Konselhu nian, tanba nee labele hateten ba iha publiku sira, kona-ba desizaun saida mak sei foti tuir mai. Maibe prosesu sei lao, kuandu desizaun sai ona publiku sira mos bele hatene kona-ba desizaun saida mak foti.
Tanba hanesan Prezidente Konselhu no Vogal Konselhu balu hatene ona kona-ba asaun nee, tanba nee tenke koloka ba iha ajenda Konselhu nian hodi diskute kona-ba kestaun neebe iha, tanba nee marka ona ajenda reuniaun ba iha Sesta semana nee nian.
Iha fatin ketak, Ministru Justisa (MJ), Sergio Hornai dehan, ema hotu bele lori karreta Estadu, maibe halao deit servisu. “Ema hotu bele lori karreta Estadu nian halao deit servisu, Juiz Prokurador, Defensor, Advogadu no Funsionariu hotu, bele halo deit utilizasaun patrimoniu Estadu nian hanesan agora hau mai daudaun, biar iha Domingu maibe hau halao servisu Estadu nian, halo deit ba iha interese Estadu nian,” dehan MJ, Segio.
MJ hatutan, hanesan Ministru iha reuniaun Konselhu Kordenasaun Setor Justisa sei hatoo idea sira katak, la admite uza patrimoniu Estadu ba interese partikular. Tanba nee kuandu sai ona viral, Konselhu Superior liu husi nia deliberasaun atribui kompetensia ba iha Inspetor atu halo prosesa, tanba sa, oinsa sa mak bele too iha Tasi Tolu.
(ter)