DILI, STLTIMORLESTE.com – Depois halo autopsia ba maktoban Silvano Gomes nia isin mate iha Hospital Nasional Guido Valadares (HNGV), familia no autoridade husi Postu Uatucarbau, Munisipiu Viqueque sei lori hikas matebian ba nia rezidensia hodi halot tuir kultura.
Maun husi Matebian Silvano Gomes, Reinaldo Basilio hatete, nia parte la hatene inisiu husi problema nee, tanba momentu neeba nia servisu iha Viqueque nomos halo hela kurativu matan iha Dili.
“Hau servisu iha Viqueque no mai halo kurativu matan iha Dili, neebe hau ladun hatene prosesu akontesimentu nee ho lo-loos. Maibe bazeia ba informasaun neebe espalha iha media sosial no husi hau nia xefe suku rasik katak, hau nia alin hetan tiru husi polisia neebe mak lori ona ba Postu Saude Uatucarbau. Iha neeba haree ba realidade nia situasaun nee grave entaun halo komunikasaun ho Viqueque tenke transfere. Depois halo meius ho parte saude Munisipiu Viqueque, oinsa nia situasaun grave hanesan nee kontaktu aviaun mai tula hodi transfere mai HNGV Dili. Too iha Dili iha loron Sabado tuku 4 ho balun, rejistu hotu tiha, hodi leno hatudu katak nia hetan tiru borus. Neemak iha tuku 8 kalan halo operasaun husi mediku espesialista sira,” dehan nia ba STL iha HNGV Bidau, Segunda (17/08/2026).
Nia katak, maibe tanba nia orgaun balun kartus musan halo borus hotu, neebe ohin dader matebian fila no hakotu vida.
Neemak familia koopera ho parte investigasaun hodi halo autopsia, atu nunee bele foti fila fali sampel ruma hodi sai faktus evidensia ba iha tribunal.
“Iha prosesu operasaun nian, buat hotu lao ho diak maibe ida nee grave tanba nia orgaun balun mak kartus musan halo rahun tiha ona. Ami familia husi Maktoban Silvano Gomes apresia ho Ministeriu Saude (MS) nia servisu ho ekipa, doutor espesializada ho nia asistensia sira servisu ho profisional duni. Mate nee ita hotu mate, maibe ba kazu nee prosesu lao hela no husi parte nee familia oferese alin nia isin hodi halo autopsia para bele foti fila fali sampel ruma hodi sai faktus evidensia ba iha tribunal. Neebe depois autopsia Komandante PNTL Munisipiu ho autoridade no familia sei lori fali ba Uatucarbau,” dehan nia.
Nia hatutan, kazu nee husi familia kontinua foti too ba parte iha justisa, hodi nunee justisa nee bele transparansia no justu. Hakarak ka lakohi justisa tenke lao ba oin nafatin.
Iha fatin hanesan Administrador Postu Uatucarbau, Anacleto Doutel Sarmento katak, senti triste ba joven no komunidade neebe lakon vida. Iha asidenti ida nee nudar autoridade, komunidade no joven la espera katak entre instituisaun ho joven neebe mak sai vitima depois hetan asidenti.
“Ami hotu husi Uatucarbau injeralmente husi suku 6 lakon duni ami nia joven neebe durante nee hela iha area Uatucarbau. Injeralmente akontesimentu nee akontese tiha mak foin ami hatene, tanba momentu nee PNTL halo nia atividade rodaviaria iha fatin destakadu no alin matebian nee mos halo movimentu ba mai. Neebe akontesimentu oinsa ami so hein deit rejutadu husi parte kompetensia hanesan polisia no justisa nian,” dehan nia.
Nuudar autoridade no komunidade la interven servisu husi PNTL no justisa nian. Nudar autoridade no komunidade injeralmente husi suku 6 nian, nudar aman ba suku 6 nee nian katak senti lakon no senti tristi ba asidente nee.
Nia sujere, ba futuru presiza husi intstituisaun bele haree ninia pesoal no ema neebe mak destakadu iha fatin neebe deit, presiza halo sensibilizasaun no formasaun ba situasaun sira nee. Akontesimentu nee hanoin katak, ema hotu la espera maibe akontese hanesan nee ona, husi parte autoridade no familia prontu koopera ho autoridade PNTL lori matebian joven nee bele too iha nia rezidensia Uatucarbau.
“Akontesimentu nee iha estrada no iha atividade servisu nian, atu mosu konfrontu husi parte rua nian nee so husi investigasaun Polisia nian mak sei hatene nia rejultadu,” tenik nia.
Nunee mos pesoal saude neebe lakohi fo sai naran hatete, matebian nia orgaun balun mak rahun tiha tanba kartus musan borus. Nee mak depois halo tiha operasaun haree ba vitima nia kondisaun grave, tanba orgaun balun la diak ona.
(dom)
