Deputada CNRT Kestiona Instituisaun F-FDTL Atribui Deit Promosaun Deviza Ba Mane

Prezidente Komisaun F, Parlamentu Nasional (PN), Maria Gorumali Barreto. (Foto: STL/Jeniche da Costa)

DILI, STLTIMORLESTE.com – Prezidente Komisaun F neebe mak trata Assuntu Saude, Seguransa Sosial no Igualidade Jeneru iha Parlamentu Nasional (PN), atual Deputada Bankada CNRT, Maria Bareto kestiona mekanizmu promosaun deviza iha instituisaun FALINTIL Forsa Defeza Timor Leste (F-FDTL), tanba atribui deit deviza ba mane, maibe haluha feto sira.

Kestaun nee Deputada Maria Bareto levanta liu husi plenaria Parlamentu Nasional (PN), Segunda (03/02/2025).

“Visi Ministru, horiseik hau partisipa iha komemorasaun tinan 24 transformasaun FALINTIL ba FALINTIL Forsa Defeza Timor Leste (F-FDTL), iha atividade neebe importante tebes mak halo promosaun, maibe ami haree promosaun nee ba hotu mane deit, nein iha feto ida,” hatete Deputada Maria Bareto.

Deputada Maria Bareto husu Visi Ministru Assuntu Parlamentares atu fo esplikasaun ida iha Instituisaun F-FDTL nee feto iha ka lae mak atribui deit deviza ba mane.

“Feto nia servisu mak sira hiit bandeza tau deviza hodi ba promove mane sira, maibe superior sira iha Ministeriu Defeza no Instituisaun F-FDTL neeba la hanoin atu fo promosaun ba feto sira,” tenik nia.

Nia akresenta katak, prosesu promosaun neebe iha sai preokupasaun husi bainaka korpu diplomatiku sira neebe mak partisipa iha komemorasaun Tinan 24 transformasaun FALINTIL ba F-FDTL).

“Sira hatete mai hau katak, feto sira nee sai forsa nee obrigatoriu ka, nee perguntas ida neebe mak hatun ita, tanba ita nia konstituisaun artigu 16 ho 17 koalia klaru hela iha neeba. Neebe Visi Ministru lalika fo razaun katak ita nia maluk feto sira servisu iha neeba nee la kleur hetan isin, tanba nee mak la hetan promosaun, tanba favor ida halo mos promosaun ba feto maluk sira,” dehan nia.

(alb)

Share it :

Leave a Reply

Your email address will not be published. Required fields are marked *