DILI, STLTIMORLESTE.com – Deputadu husi Bankada FRETILIN iha Parlamentu Nasionálal, Antoninho Doutel Sarmento hatoo preokupasaun boot konaba situasaun ekonomika rai laran neebe hanesan dezafiu seriu, no kestiona pratika husi grupu ilegal ka mafiozu sira neebe kontinua buras, hodi aproveita fatin husi frakueza ekonomika nee.
Iha ninia komentariu, Deputadu nee hateten katak bainhira dezenvolvimentu no jestaun finansas publika la lao ho loos, pratika ilegal ka interese grupu partikular sira nian mak sai fali solusaun falsu neebe foti benefísiu husi dezafiu boot neebe povu no Estadu hasoru.
“Bainhira ekonomia moras todan, solusaun mak mafiozu sira mak buras iha rai ida nee hodi kura fali ekonómia moras nee,” kestiona Deputadu Antoninho Doutel Sarmento ba STL, iha PN, Dili, Segunda nee (20/07/2026).
Situasaun nee, tuir reprezentante povu nee, presiza hetan atensaun urjente husi Governu liu-liu iha mudansa polítika investimentu no fiskalizasaun neebe klean, nunee labele fo fatin ba grupu ka interese kapital ho dalan la loos hodi domina no monopoliza rikusoin Estadu nian iha tempu krizi.
Deputadu husi Bankada Opozisaun nee mos husu ba Governu atu foti asaun konkreta, hodi labele husik krizi ekonomika sai fali oportunidade ba deit interese klán ka pratika grupu ilegal ka mafiozu sira.
Iha parte ketak Observador Polítika, Mariano da Silva, konsidera katak krítika neebe hatoo husi membru Parlamentu nee hanesan avizu importante ida ba governu ka ezekutivu sira. Tuir nia, Estadu presiza duni hametin instituisaun kontrolu sira hodi garante katak, osan publiku no programa dezenvolvimentu nasional labele monu ba interese kapital grupu elite deit, maibe tenke sirkula hodi foti fali povu kiik nia moris husi susar ekonomika.
Entretantu Akademista husi Universidade Nasional Timor Lorosa’e (UNTL), Silveiro de Araújo, fo hanoin katak dezafiu boot neebe nasaun infrenta presiza rezolve ho planeamentu ekonomiku neebe bazeia ba faktu ho dadus, laos deit ho diskusaun polítika.
Nia salienta katak atu hapara pratika monopoliu no manipulasaun husi grupu balu, akademika sira rekomenda ba Governu atu foka liu ba diversifikasaun ekonomika, investe iha setor produtu lokal, no hametin transparensia iha kualidade gastu publiku nian.
(car)
