DILI, STLTIMORLESTE.com – Embaixador Japaun ba Timor Leste, YAMAMOTO Yasushi hatete, desde 2009, joven Timoroan liu 1.800 mak partisipa iha programa JENESYS inklui interkambiu online.
Embaixador YAMAMOTO Yasushi hato’o kestaun nee liuhosi diskursu iha sesaun relatoriu JENESYS 2025 neebe realiza iha Embaixada Japaun, Pantai Kelapa, Dili (24/4/2026).
Embaixador YAMAMOTO Yasushi hato’o obrigado ba partisipante sira nia prezensa iha sesaun relatoriu JENESYS 2025.
“Ha’u kontente atu fó benvindu ba partisipante sira hotu JENESYS 2025 nian, ne’ebé maka fila hosi Japaun ho esperiensia barak ne’ebé maka fó fuan,” hatete Embaixador Yasushi.
Nia haktuir tan katak, JENESYS (Rede Interkámbiu Japaun-Azia Leste ba Estudante no Foin-sa’e sira) maka programa interkámbiu ema-ba-ema entre Japaun no rejiaun Ázia-Pasifiku.
Embaixador Yasushi hatete, durante Tinan Fiskál Japaun nian ikus liu, hahú husi Abril 2025 to’o Marsu 2026, juventude Timor-oan nain 23 partisipa iha programa JENESYS tolu ho tema sira mak; – Konferensia Estudante sira nian, ASEAN-Japaun Desportu (Futeból) x ODS Interkámbiu ba Foin-sa’e sira no Timor Leste – Japaun Resposta Emerjénsia no Redusaun Risku Dezastre, Troka Negósiu no Emprezariál.
“Sesaun relatoriu ohin nian nu’udar oportunidade di’ak ida ba ita-boot sira, partisipante sira JENESYS nian atu fahe ita-boot sira-nia konhesimentu no esperiensia neebé hetan durante ita-boot sira hela iha Japaun no mós planu asaun sira neebé ita-boot sira implementa ona ka hanoin atu implementa iha Timor-Leste,” tenik Embaixador Yasushi.
Embaixador Yasushi mos hatutan tan katak nia hein aprezentasaun sira kona ba saida mak sira deskobre ona no aprende ona iha Japaun, no mós oinsá sira hakarak kontribui ba futuru dezenvolvimentu imi-nia rain rasik, Timor-Leste.
“Hau hein katak ita-boot nia amizade neebé ita-boot haburas iha Japaun sei sai hanesan rikusoin ida iha ita-boot nia moris no habelar ita-boot nia opsaun kareira sira iha futuru. Ha’u mós hein katak ita-boot sira sei komunika la’ós de’it iha grupu JENESYS nia laran ne’ebé hanesan, maibé mós ho membru grupu sira seluk no partisipa ativu iha atividade sira Asosiasaun Alumni JENESYS nian iha Timor-Leste no eventu kulturál Japaun nian ne’ebé sei organiza hosi Embaixada Japaun nian. Ha’u hakotu ha’u-nia komentáriu hodi dezeja buat di’ak hotu ba ita-boot sira-nia esforsu iha futuru no nuudar ponte amizade entre Japaun no Timor-Leste,” tenik Embaixador Yasushi.
Entertantu, Mercia Mendonca do Espiritu Santo neebe partisipa ona iha programa JENESYS nee hatete nia sente konteti tebes tanba reprezenta ninia universidade (UCT/Univerisidade Catolika Timorense) nomos nasaun Timor Leste bele aprende buat barak iha Japaun nian hanesan Japaun nia sosiedade, kultura, edukasaun no teknolojia neebe avansadu tebes hodi rezolve problema sira iha sosiedade.
“Hau sente kontenti tebes tanba bele reprezenta hau nia universidade no nasaun Timor Leste aprende buat barak iha Japaun,” hatete Mercia,
Nunee mos, Adriana Soares Barreto neebe partisipa iha programa JENESYS hatete nia sente orgulhu tanba reprezenta ninia Eskola Sekundaria Nossa Senhora de Fatima Railaku partisipa iha programa JENESYS iha tinan 2025.
Nia dehan, durante iha Japaun aprende buat barak hanesan kultura, edukasaun no teknolojia.
“Ami sai husi Timor iha loron 27 Outubru 2025 no to’o iha Japaun iha loron 28 Outubru 2026. Durante iha Japaun ami adapta ho kultura Japaun nian no ami aprende buat barak iha Japaun,” katak Adriana.
(mik)
