DILI, STLTIMORLESTE.com – Tribunal Judisial Primeira Instansia Dili (TJPID) julga arguidu inisial DIT hanesan laen, neebe halo agresaun hasoru nia feen ofendida inisial SEdJ.
Iha indisus sufisiente katak, iha loron 4 fulan Maiu tinan 2025, iha Manleuana, arguidu lori ofendida ba iha Manleuana atu tur hamutuk koalia konaba alin nia folin.
Maibe arguidu lori lezada tama ba iha kuartu laran hodi husu konaba ofendida nia kolega fo hatene ba arguidu katak, ofendida moris hamutuk ho mane seluk no halo video.
Ofendida hatan ba arguidu katak, ofendida laos hanesan nee se video iha hatudu took.
Arguidu la husu tan ba ofendida, maibe foti besi baku dala barak ba iha ofendida, hetan kanek no raan sai barak, kontinua lori liman tuku iha matan fukun parte karuk rezulta bubu metan, kona iha brasu no liman fuan rezulta moras no naksalak lori ain tebe iha kanotak hetan bubu.
Arguidu mos dehan ba ofendida katak, o labele sai husi kuartu nee too o nia kanek diak, se o tenta sai mak sei oho mate ofendida.
Arguidu sai ba liur hodi tur ho nia kolega sira, ofendida mos aproveita foti telefone husu ajuda ba nia kolega informa ba iha Polisia hodi mai iha fatin akontesimentu.
Arguidu laos foin halo agresaun ba ofendida maibe bebeik ona. Konsekuensia husi arguidu nia hahalok nee halo ofendida sente moras.
Tanba nee Ministeriu Publiku akuza arguidu komete krime Maus Tratus ba Konjuje neebe previstu iha artigu 154 ho forma Violensia Domestika.
Hatan ba akuzasaun nee arguidu konfesa katak, faktus neebe iha los hotu. Arguidu rekonhese motivu husi problema nee tanba deit mosu deskonfia.
Arguidu deklara, oras nee daudaun sira iha oan ida, moris hamutuk nudar feen no laen, la iha tan problema ona.
Hanesan aman ida, arguidu arepende tebes nia hahalok nee, arguidu deklara mosu deskonfia tanba hadomi.
Lezada mos haforsa tan akuzasaun katak, arguidu halo duni agresaun, maibe husi akontesimentu mai too agora la iha tan problema ona.
Rona tiha arguidu no lezada, Ministeriu Publiku iha alegasaun deklara katak, atu halo prevensaun ba iha futuru, MP husu Tribunal atu aplika pena prizaun tinan 2 suspende ba tinan 2.
Enkuantu husi parte defeza nian haree katak, arguidu no ofendida diak malu ona, ho nunee husu Tribunal atu tetu no aplika pena neebe justu.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juiz Koletivu, Arjentino Nunes, Zulmira Auxiliadora, Juiz estajiadu nain ida, Ministeriu Publiku reprezenta husi Prokurador Rafael Gusmao, arguidu hetan asistensia legal husi Defensor Publiku Germano.
(ter)
