DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguida inisial JBdS hanesan feen, neebe halo agresaun hasoru ofendidu inisial JYdS.
Indisiu sufisiente iha autus katak, ofendidu JYdS moris hamutuk hanesan feen ho laen ho arguida JBdS iha tinan 2016 iha oan nain 4 no ekonomikamente dependensia ba malu.
Iha loron 25 fulan Julhu tinan 2025, iha Lahane Oriental Dili, haleu oras 15:30 OTL, arguida JBdS hakat ba lori liman baku dala rua kona iha ofendidu nia kotuk laran, arguida komu liman rua hodi dudu ofendidu monu ba rai halo ofendidu nia ain tur baku ba iha rai.
Konsekuensia direita husi arguida nia hahalok nee halo ofendidu hetan ain tur kanek nakles no raan, bubu no moras makaas iha kotuk laran.
Kauza husi problema nee tanba arguida rai osan US$ 20.00 lakon, arguida dun fali dehan ofendidu mak lori ba joga, nunee mak mosu problema.
Arguida JBdS halo ho forma livre, deliberada no konsientemente hatene katak, hakat ba lori liman baku dala rua kona iha ofendidu nia kotuk laran, arguida komu liman rua hodi dudu ofendidu monu ba rai halo ofendidu nia ain tur baku ba iha rai, nudar meiu neebe aptu hodi hamosu ofensa ba lezadu nia isin lolon no saude.
Arguida hatene katak, nia hahalok nee proibidu no punidu tuir lei penal.
Tanba nee konstitui arguida JBdS nuudar autor material ho forma konsumadu ba pratika krime ofensa ba integridade fizika simples ho forma violensia domestika 1, previstu no punidu tuir artigu 145 husi Kodigu Penal konjuga ho artigu sira 2, 3 alinea a) no artigu 35º alinea B husi Lei Kontra Violensia Domestika n.º07/2010, loron 07 fulan Julhu.
Hatan ba akuzasaun nee, arguida hili direitu nonok. Tribunal deside la rona lezadu nia deklarasaun, tanba lezadu matebian ona.
Tanba nee Tribunal deside tama ba iha alegasaun. Iha alegasaun Prokurador husu Tribunal atu aplika pena multa ba arguidu.
Enkuantu husi parte defeza nian husu Tribunal tetu sirkunstansia sira hotu hodi foti desizaun neebe justu.
Rona tiha alegasaun, Tribunal adia ba loron seluk hodi rona desizaun.
Audensia Julgamentu nee prezide husi Juiz Singular, Ivan Patrocenio, Ministeriu Publiku reprezenta husi Prokuradora estajiaria nain ida, no arguida hetan asistensia legal husi Defensor Publiku, Fernando Lopez.
(ter)
