DILI, STLTIMORLESTE.com – Tribunal Judisial Primeira Instansia Dili (TJPID) halao prosesu primeiru interogatoriu ba arguidu nain tolu ho inisial JS, LR no MD.
Arguidu sira lori mai iha Tribunal, no husi parte Ministeriu Publiku (MP) promove ho krime Furtu Agravadu neebe previstu iha artigu 252 husi Kodigu Penal.
Juiz estajiadu halo tiha indentifikasaun ba arguidu nain tolu, ikus mai Juiz deside hodi tama ba iha faze alegasaun.
Iha alegasaun Prokurador husu Tribunal atu aplika medida Prizaun Preventiva (PP) ba arguidu nain tolu, tanba konsidera iha indisus forte.
Enkuantu husi parte defeza nian husu Tribunal atu aplika medida Aprezentasaun Periodika (AP) ba arguidu nain tolu, tanba sira mesak estudante.
Rona tiha alegasaun, ikus mai Juiz deside aplika medida Aprezentasaun Periodika (AP) ba arguidu nain tolu atu aprezenta aan kada fulan iha Ministeriu Publiku.
Prosesu primeiru interogatoriu nee prezinde husi Juiz estajiadu nain ida, Ministeriu Publiku reprezenta husi Prokuradora estajiada nain ida, arguidu sira hetan asistensia legal husi Defensor Publiku Sergio Dias Quintas.
Tuir kronolojia katak, deskonfia arguidu nain tolu foti osan atus tolu, osan mean no laptop ida iha Maneleuana neebe akontese iha loron 3 fulan Maiu tinan 2026.
Husi osan no sasan neebe arguidu nain tolu foti nee, ekivale ba osan hamutuk rihun US$ 6.
(ter)
