DILI, STLTIMORLESTE.com – Komisaun Anti Korupsaun (KAK) submete funsionariu ida ho inisial ZMDS ba Tribunal, tanba deskonfia pratika krime Pekulatu de Uzu.
Iha loron Kuarta (22/07/2026), KAK aprezenta detidu nee ba iha Tribunal Judisial Primeira Instansia Dili (TJPID) hodi tuir prosesu primeiru interogatoriu.
Iha prosesu primeiru interogatoriu nee, Juiz estajiadu rona tiha sidadaun nee nia deklarasaun, no pasa kedan ba alegasaun husi Ministeriu Publiku no defeza.
Iha alegasaun Ministeriu Publiku solisita ba iha Tribunal atu aplika Medida Termo Indentidade Rezidensia (TIR) no medida Aprezentasaun Periodika (AP), hodi hein prosesu investigasaun.
Alegasaun husi parte defeza nian aseita ho alegasaun husi MP.
Rona tiha alegasaun, Tribunal suspende ba iha loron Kinta, hodi rona despaisu husi Tribunal nian.
Prosesu nee prezide husi Juiz estajiadu nain ida, Ministeriu Publiku reprezenta husi Prokurador Rafael Gusmão, suspeitu nee hetan asistensia legal husi Defensor Publiku Marsal Mascarinhas.
Tuir informasaun husi fontes konfirmadu katak, funsionariu nee KAK detein iha estasaun kombustivel mina Aitula Fuel iha Komoro, iha loron Segunda. Momentu neeba deskonfia funsionariu refere uza kupon Governu nian hodi ba ense mina ba nia kareta privadu.
Tuir fontes nee, antes nee ense ona US$ 300, ba ense segundu iha US$ 63 hodi KAK detein kedan detidu nee.
(ter)
