DILI, STLTIMORLESTE.com – Feto Timor-Leste hasoru dezafiu barak iha luta, maibé nia atinzimentu iha polítika, lideransa no dezenvolvimentu mos aumenta.
Sekretária Estadu ba Igualdade (SEI), Elvina Sousa Carvalho, hatete ida-ne’e ba STL iha Salaun Maria Goreti Kaikoli, Tersa (06/10/2026). Nia hatete, selebrasaun Loron Nasionál Feto ba dala 50 sei fó oportunidade atu haree fila fali feto nia kontribuisaun.
“Dezafiu barak, maibé atinzimentu barak ne’ebé feto sira hetan, iha polítika, dezenvolvimentu no edukasaun,” dehan Elvina.
Nia hatete, selebrasaun tinan 50 sei fó mós énfaze ba memória heroika no korajen feto sira iha tempu pasadu.
Liuliu, feto sira ne’ebé lakon sira nia vida no ho aten-brani hasoru invazór sira hodi luta ba ukun-rasik-an.
“Feto sira servisu ho aten-brani, luta ho aten-brani ba ukun-rasik-an ida-ne’e,” dehan Sekretária Estadu.
Elvina hatete, durante luta ba ukun-rasik-an, feto sira kontribui makaas hamutuk ho mane sira, inklui kaer kilat no partisipa iha rezisténsia.
Nia hatete, hafoin Timor-Leste restaura independénsia, feto sira kontinua kontribui iha polítika, dezenvolvimentu, lideransa no foti desizaun.
“Feto nia partisipasaun makaas iha polítika, lideransa no foti desizaun, inklui iha F-FDTL no PNTL,” nia hatete.
Elvina mós hatete, selebrasaun Loron Nasionál Feto la’ós foin halo dala uluk, maibé hahú ona iha tempu luta iha tinan 1976.
“Nee hatudu katak iha tempu funu, iha ai-laran, feto sira mós selebra Loron Nasionál Feto,” dehan Elvina.
Tuir nia, lideransa nasional iha tempu ne’ebá komprende katak feto nia partisipasaun importante no krusiál ba luta ukun-rasik-an.
Nune’e mos Akademista Judite Dias Ximenes hatete, feto sira iha tempu luta hatudu korajen, maski hasoru barreira oioin iha sira nia dalan.
“Ita haree iha tempu luta, feto sira hatudu kedas sira nia brani, maski feto, sira kaer kilat hamutuk ho mane sira,” dehan Judite.
Nia hatete, korajen heroína sira iha tempu pasadu tenke sai inspirasaun ba feto foin-sa’e sira atu kontinua luta ba futuru.
Tuir Judite, maski barreira sei eziste, ho korajen, matenek no determinasaun, feto sira bele kontinua kontribui ba dezenvolvimentu nasaun.
Nune’e mos Primeiru-Ministru Kay Rala Xanana Gusmão mós hatete katak papel feto importante tebes iha prosesu dezenvolvimentu nasional.
Nia enkoraja feto sira atu kontinua aumenta kapasidade no involve-an iha atividade sira tuir sira nia kapasidade.
Selebrasaun Loron Nasionál Feto ba dala 50, iha Novembru, sei sai mós momentu atu komemora luta, sakrifísiu no kontribuisaun feto Timor-Leste.
Memória feto sira iha rezisténsia no sira nia partisipasaun iha dezenvolvimentu nasional kontinua sai parte importante husi istória Timor-Leste.
(eme)
