DILI, STLTIMORLESTE.com – Falta infraestrutura, laboratóriu, ekipamentu no ferramenta téknika adekuadu sei sai dezafiu ba kualidade edukasaun iha Timor-Leste.
Diretor Eskola Sekundária Téknika no Vokasional (ESTV-IT) 28 de Novembro Becora-Díli, Tomas Pinto, hato’o deklarasaun ne’e ba STL Kinta, 1 Outubru 2026.
Nia dehan, dezafiu infraestrutura no rekursu material, liuliu iha área Ensinu Tékniku no Vokasional (TVET), limita oportunidade estudante sira atu halo prátika.
“Falta laboratóriu, ekipamentu mákina no ferramenta atualizadu limita estudante sira-nia oportunidade atu halo prátika direta.”
Tomas esplika katak, ESTV-IT 28 de Novembro iha departamentu tékniku sira, inklui Eletrónika, Informátika no Arte Gráfika.
Tanba ne’e, nia konsidera ekipamentu no ferramenta atualizadu importante atu suporta atividade prátika no dezenvolve kompeténsia téknika estudante sira.
Nia mos hatete, kualifikasaun no formasaun professór tékniku presiza aumenta, atu sira bele akompaña dezenvolvimentu teknolojia ne’ebé lao lalais.
“Presiza aumenta númeru no kapasidade professór tékniku sira nian hodi bele akompaña mudansa teknolojia ne’ebé avansa lalais.”
Aleinde ne’e, Tomas dehan, relevánsia kurríkulu ho merkadu traballu mos sai dezafiu, tanba presiza kontinua ajusta ho nesesidade indústria no setór privadu.
Nia hatutan katak, asesu ba materiál iha lian Portugés, inklui livru referénsia, materiál didátiku no rekursu pedagójiku, sei limitadu.
Tomas mos temi importánsia engajamentu inan-aman no komunidade atu haforsa kooperasaun ho eskola, liuliu iha disiplina, asisténsia no atividade eskolar.
Oportunidade estajiu no prátika profisionál mos sei sai dezafiu tanba difikuldade estabelese parseiria kle’an ho empreza no instituisaun relevante.
Tomas subliña katak, superasaun dezafiu sira-ne’e presiza kolaborasaun entre governu, parseiru dezenvolvimentu, lideransa eskola no komunidade.
Iha parte seluk, Diretor Ezekutivu TLCE, Jose Monteiro, dehan Ministeriu Edukasaun presiza haree ho seriu kapasidade sistema edukativu atu adapta ho mudansa teknolojia no informasaun global.
“Mudansa teknolojia iha mundu avansa teb-tebes, maibé ita seidauk iha kondisaun atu akompaña dezenvolvimentu ne’e.”
Enkuantu, Diretor-Jeral Ensinu Sekundáriu iha ME, Deolindo da Cruz, hatete sistema edukasaun enfrenta dezafiu barak tanba envolve aspetu oioin, inklui formasaun no kurríkulu.
“Ita hasoru dezafiu barak iha sistema edukasaun, maibé ita presiza halo reparasaun didi’ak.”
(jac)
