DÍLI, STLTIMORLESTE.com – CAMSTL haforsa dijitalizasaun arkivu audiovisual hodi preserva memória istórika, kultura no identidade Timor-Leste ba jerasaun futuru.
Diretór Ezekutivu CAMSTL, Eudicítio Pinto hatete, evolusaun teknolojia presiza akompanha ho mudansa maneira servisu, liuliu iha ekosistema dijitál.
Nia hatete, sistema servisu agora presiza adapta ba media dijitál no plataforma transmisaun, inklui televizaun, hodi garante arkivu audiovisual sira preserva ho diak.
“Teknolojia foun sai rekursu esensiál atu preserva istória, kultura no patrimóniu audiovisual Timor-Leste, atu nune’e memória la lakon iha futuru,” dehan Eudicítio.
Eudicítio koalia ba jornalista sira iha Auditorium Fakuldade Ekonomia no Jestaun UNTL, Segunda-feira (05/10/2026), kona-ba importánsia dijitalizasaun.
Governu Konstitusionál, liu husi Sekretaria Estadu Komunikasaun Sosiál, estabelese parseira estratéjika ho CAMSTL hodi salvaguarda patrimóniu audiovisual Timor-Leste.
Husi kolaborasaun ne’e, CAMSTL preserva ona arkivu multimédia dijitál hamutuk atus lima iha 2025, inklui dokumentu audiovisual ho valor istóriku.
Iha 2026, CAMSTL planeia aumenta tan arkivu multimédia dijitál liu husi rihun ida, inklui arkivu husi RTTL, IP no instituisaun públika sira.
Sekretáriu Estadu Komunikasaun Sosiál, Expedito Dias Ximenes, hatete dokumentu audiovisual iha valor boot ba preservasaun memória istórika no identidade Timor-Leste.
Nia hatete, dokumentu audiovisual sira dokumenta diretamente istória povu Timor-Leste, esperiénsia komunidade, kultura, transformasaun sosiál no dezenvolvimentu nasaun.
“Memória audiovisual bele sai fonte ba jerasaun futuru atu aprende, komprende no valoriza istória no identidade Timor-Leste,” dehan Expedito.
Expedito subliña, salvaguarda memória audiovisual la’ós responsabilidade instituisaun ida de’it, maibé presiza partisipasaun hosi parte hotu iha sosiedade.
Iha parte seluk, estudante Fakuldade Petroliu, Natalia Gomes hatete, dijitalizasaun importante ba setor hotu, inklui setor petrolíferu, tanba aumenta efisiénsia no transparénsia.
Nia hatete, teknolojia dijitál bele ajuda setor petrolíferu monitoriza produsaun, ekipamentu no prosesu operasionál iha tempu reál, hodi hadi’a jestaun rekursu.
“Sistema dijitál bele reduz uza papel, traballu manual no tempu prosesu administrativu, enkuantu facilita monitorizasaun kontratu no produsaun,” dehan Natalia.
Nia hatutan, dijitalizasaun mós bele facilita monitorizasaun reseita no movimentu osan, nune’e ajuda aumenta transparénsia no prevene irregularidade iha setor petrolíferu.
(dom)
