DILI, STLTIMORLESTE.com – Direjente husi Ensinu Baziku central (EBC) Manleuana hamutuk ho inspetor eskolar, observa prosesu aprendizajen iha sala de aula.
Diretor Ensinu Baziku Central Manleuana, Carlos Correia ba STL iha nia knaar fatin Manleuana, Kuarta nee (29/07/2026) dehan, ho observasaun neebe mak sira halo, oinsa kada loron profesores sira bele prepara planu de aula neebe mak diak, maibe profesores husi eskola ida nee nafatin halo sira nian planu de aula.
“Hau hanoin durante nee ami nian profesores sira nee kada loron sempre aprezenta sira nian planu de aula, tanba ami nian inspetor eskolar nee mai haree hela deit, tanba halo observasaun aprendizajen iha sala de aula. Nee duni inspetora halo observasaun tama no sai iha sala de aula,” nia esplika.
Nia hatutan, observasaun ba aprendizajen husi profesores nee laos inspetor mesak deit, maibe adjuntu husi eskola refere nafatin observa atividades ensinu aprendizajen neebe halao husi kada profesores disiplina ida-idak nian.
“Ita nian inspetor sira mai observa aprendizajen iha eskola nee depende, tanba laos observa ba eskola ida deit lae, maibe ba ita nian eskola barak, nee duni ita nian profesores sira halo planu de aula, tanba nee halo ba eskola públiku no pribadu hotu,” katak nia.
Iha fatin seluk, Diretor Servisu Edukasaun Munisípiu Liquiça, Julio da Silva hatete, inspetor eskolar sira nafatin halo monitoring ba atividades neebe mak lao iha eskola sira inklui programa merenda eskolar, oinsa mak manorin sira bele prepara planu de aula molok halao aprendizajen ba estudantes sira.
“Durante nee ita nian inspetor eskolar sira nafatin halo monitoring ba ita nian atividades neebe mak lao iha eskola sira, tanba inspetor sira nee balun halo monitoring ba iha ensinu pre eskolar, ensinu baziku, tekvo no ensinu sekundariu, sira ida-idak halao servisu tuir nibel ensinu neebe mak mensiona,” dehan nia.
Julio dehan, inspetor sira nee monitoring ba eskola sira nee hanesan monitoring ba atividades prosesu aprendizajen, implementasaun programa merenda eskolar nomos atividades hotu neebe mak halao iha eskola sira.
Iha parte seluk, Superintendente Edukasaun Munisípiu Dili, Cesarina C. Guterres hatete, inspetor eskolar sira nee halo monitoring ba eskola sira, monitoring ba atividades hirak neebe mak lao iha eskola sira.
“Hau hanoin ita nian inspetor eskolar sira nee mak halo monitoring ba ita nian eskola sira, tanba sira monitoring ba prosesu aprendizajen merenda eskolar, nunee mos atividades seluk neebe lao iha ita nian eskola ida-idak,” nia informa.
Iha fatin la hanesan, Koordenador EBF nu. 5 Comoro, Marcelino Moniz hatete, inspetor eskolar sira nee mai iha sira nian eskola haree merenda eskolar nee lao tuir menu neebe mak iha ka lae nomos monitoring ba aprendizajen iha eskola.
“Hau hanoin ita nian inspetor eskolar sira nee mai iha sira nian eskola haree merenda eskolar nee lao tuir menu neebe mak iha ka lae, nomos monitoring ba aprendizajen iha eskola,” katak nia.
(jac)
