DILI, STLTIMORLESTE.com – Ministeriu tolu hanesan Ministériu Eduksaun (ME), Ministeriu Saude (MS) no Ministériu Administrasaun Estatal (MAE) halao formasaun ba direjente eskola iha munisipiu tolu.
“Hau hanoin konaba formasaun ba ita nian direjente husi eskola sira nee lao ona, agora ami halo hela koordenasaun husi parte Ministériu Saude nian, husi Diresaun Nasional Nutrisaun, iha fulan kotuk ba nee halo ona formasaun nee iha Munisipiu Dili, postu haat nee halo iha Metinaro, fo formasaun konaba oinsa atu bele ezekuta tuir mata dalan ba menu, liu-liu ba Munisipiu Dili ninia, husi Segunda too Sesta ninia,” katak Belchior Maria Almeida Barros hanesan Xefe Departamentu Programa Merenda Eskolar iha ME ba STL, Segunda nee (25/05/2026).
Nia afirma, formasaun nee oinsa mak atu kumpri didiak manual, segundu koalia konaba gastus sira neebe mak sira halo ba iha orsamentu estadu ninia, mezmu orsamentu neebe mak sira foti nee trimestral, maibe sira nian gastus nee kada semana loron lima, entaun sira tenke hatoo relatóriu nee kada semana.
“Tenke halo relatóriu nee kada semana, loron lima ninia nee ba iha eskola atu nunee eskola bele kontrola, iha Munisipiu Dili ninia implementador nee mak eskola, ita halo ona formasaun iha Dili, Aileu, Manatuto, Munisipiu tolu nee mak ita fo ona orientasaun, tuir fali mai nee mak Likisa, Ermera no Bobonaro,” nia informa.
Nia dehan, formasaun nee halao ba direjente eskola sira hanesan Koordenador husi nivel pre eskolar, Koordenador Filial, Diretor EBC no responsavel programa merenda eskolar nian iha munisípiu, Xefe Departamentu, Diretor Edukasaun Munisípiu sira, formasaun nee halao husi Ministeriu Edukasaun, Ministeriu saude no Ministériu Administrasaun Estatal (MAE).
Nunee mos Diretor EBC Manleuana, Carlos Correia dehan, uluk sira partisipa ona formasaun kona-ba oinsa mak atu implementa merenda eskolar nee ho diak iha eskola, nunee estudantes sira asesu merenda ho diak.
“Uluk ami partisipa ona formasaun konaba oinsa mak atu implementa merenda eskolar nee ho diak iha eskola, ho nunee estudantes sira asesu merenda ho diak, tanba partisipa iha formasaun nee importante tebes,” nia dehan.
(jac)
