BAUKAU, STLTIMORLESTE.com – Diresaun Munisipal Transporte no Komunikasaun (DMTK) Baukau seidauk halo mudansa ba tarefas pasajeiru diresaun Vila Nova-Vila Antiga iha Postu Administrativu Baukau Vila, Munisipiu Baukau.
Hafoin mosu reasaun iha loron 08 Abril parte meudia, motorista transporte publiku diresaun Vila Nova ba Vila Antiga iha Baukau Vila deside hapara movimentu transporte publiku, tanba presu kombustivel no preokupa tarefas ba pasajeiru estudante no pasajeiru normal.
Nunee halao asaun hodi husu DMTK Baukau atu fo sai sikular tarefas pasajeiru nian ba estudante husi sentavus 10 ba sentavus 15 no ba funsionariu no pasajeiru idade boot nafatin sentavus 25 maibe aumenta mos sentavus 15 bainhira lao ho oan neebe nuudar estudante.
Maibe DMTK Baukau fo sai tarefas ba pasajeiru estudante no pasajeiru normal mantein bazeia ba despashu Ministerial, Numeru 013/2012 loron 13 Junhu kona-ba tarefas sirkulasaun transporte publiku iha area urbana Baukau Vila, liu-liu sirkulasaun transporte publiku diresaun Vila Nova ba Vila Antiga mak hanesan transporte publiku marka A1 route husi terminal Merkadu Munisipal Baukau ba Vila Antiga area Wainiki kada pasajeiru estudante selu US$ 0.15 no pasajeiru normal US$ 0.25.
Nunee mos transporte publiku marka A2 route husi terminal Merkadu Munisipal Baukau ba Vila Antiga area Riamare kada pasajeiru estudante selu US$ 0.15 no pasajeiru normal US$ 0.25.
“Tanba nee ami informa fila fali ba publiku katak ita seidauk iha mudansa ba tarefas Transporte Publiku, no ita mantein tarefas anterior bazeia ba Despashu Ministerial No.013/2012 de 13 de Junho kona ba tarefas sirkulasaun Transporte Publiku iha area urbana,” STL sita iha pajina Facebook Diresaun Munisipal Transporte no Komunikasaun Baukau.
(tom)
