DILI, STLTIMORLESTE.com – Ministeriu Edukasaun (ME) liu husi Diresaun Nasional Edukasaun Inkluzivu Asaun Sosial Eskolar (DNEIASE) halo ona sensibilizasaun asuntu inkluzaun ba profesores no autoridade sira iha munisípiu 13.
Lia hirak nee hatoo husi Diretor Nasional, Edukasaun Inkluzivu Asaun Sosial Eskolar, Fernando Soares ba STL iha nia knaar fatin, Sesta nee (29/05/2026).
“Konaba sensibilizasaun nee kuaze munisipiu 13 nee ita halao tiha ona, maibe Atauro mak ita seidauk ba, sensibilizasaun neebe mak durante ita halo nee ba autoridade no eskola sira ita halo, liu husi sensibilizasaun neebe mak ita halo nee, inprinsipiu ita hakarak Autoridade no Profesor sira sensibilizadu ba asuntu inkluzaun ninia, no labele husik ema ida husi kotuk, ida nee mak importante tebes,” dehan nia.
Iha parte seluk, Diretor Eskola Sekundariu Nobel da Paz, Jeremias P. de Jesus hatete, kada tinan defisiente sira mai kontinua estudu iha eskola ida nee, tanba sira iha direitu asesu ba iha edukasaun formal.
“Oinsa ita nian maluk defisiente sira nee bele asesu ba edukasaun formal hanesan ho sira nian maluk sira seluk, tanba sira iha direitu asesu ba edukasaun no ami haruka eskola gratuita iha nee,” nia dehan.
Jeremias hatutan, maluk defisiente nee balun iha nibel sekundariu no balun iha nibel ensinu baziku. Sira hamutuk nain 10 nunee mak eskola iha Nobel da Paz, tanba kada tinan sempre ida rua mai eskola iha nee.
(jac)
