DILI, STLTIMORLESTE.com – Arsebispu Arkedioseze Metropolitana Dili, Dom Virgilio Cardeal do Carmo da Silva, SDB liu husi nia omilia iha Knua DIT Aimeti Laran Kinta nee hatoo parabens ba DIT, tanba ohin bele halibur hamutuk hodi hatoo agradese.
Dom Virgilio Kardeal do Carmo da Silva SDB hatoo agradese ba Nain feto da Grasa, tanba ho nia grasa DIT ultrapasa situasaun difisil oin-oin, maibe bele ultrapasa tanba grasa Maromak nia liu husi Nain Feto neebe hasulin ona no kontinua hasulin nafatin diak ba oin.
“Parabene mos ba DIT neebe ohin inaugura kapela Nossa Senhora da Grasa no kapela nee harii husi familia boot DIT, aleinde nee misa dahuluk iha kapela nee ba tinan akademiku 2025,” dehan Dom Virgilio Kardeal.
Nunee mos Estanislau S. Saldanha, hanesan Fundador DIT hatete, ohin halo inaugurasaun kapela Nossa Senhora da Grasa no kapela nee harii husi familia boot DIT nuudar forma agradesimentu ida ba akompanhamentu no domin ba grasa boot neebe oferese husi inan santa ba familia boot DIT, iha tempu hasoru dezafiu no problema oin-oin no iha limitasaun no krize maibe DIT bele ultrapasa dezafiu sira nee ho diak tebes, nee laos DIT nia servisu mesak, maibe nee tanba grasa no akompanha no laran murak husi inan santa.
Nia dehan, ho kapela neebe mak ohin inaugura hodi hatudu domin boot no agradese wain ba familia boot DIT ba Inan Santa liu husi kapela nee, ho kapela ida nee espera katak iha prosesu hanorin tomak buka atu banati tuir valor neebe inan santa hanorin hela ba sarani sira no atividade tomak tuir prinsipiu ida nee.
“Esperansa ba oin ita hakarak dezenvolve Edukasaun ida neebe baze ba etika, baze ba kultura no faze ba fiar, liu husi edukasaun baze ba etika kultura no fiar, ita espera katak DIT bele oferese edukasaun ida neebe diak ba joven sira, laos matenek deit iha ulun, maibe iha fuan nunee tun ba komunidade bele sai ajente neebe diak, sai naroman no sai masin ba ema seluk hodi halo mudansa ba diak,” katak Estanislau.
Entretantu Reitor DIT, Salustiano dos R. Piedade lori Familia DIT nia naran agradese ba Aman Maromak liu husi Inan Santa, tanba ho nia grasa wain bele hamutuk hodi inaugura kapela no hahu ho misa dahuluk iha kapela nee ba tinan akademiku 2025. No kapela nee nuudar forma agradese wain no oferese ba Inan santa, tanba grasa wain neebe familia DIT hetan iha tinan 23 nia laran durante viajen ezistensia DIT nuudar ensinu superior ida iha Timor Leste.
Reitor nee dehan, Dili Institute of Technology (DIT) nuudar instituisaun ensinu superior privada, naun lukrativa no baze ba komunidade, nebee harii iha loron 10 fulan Maiu tinan 2002. Instituisaun nee harii husi zero no iha nia viajen, hasoru dezafiu oin-oin, maibe konsege ultrapasa ho diak no susesu. Nee tanba laran murak no grasa wain husi Inan Santa. Nunee iha tinan 2012, familia boot DIT hili Inan Santa Grasa Wain nuudar mahein DIT. Familia boot DIT mos entrega DIT ba Inan Santa hodi haree, bale no hatudu dalan. Nunee harii uluk Gruta Inan Santa iha 14 Maiu 2014 hodi agradese no iha tinan 2024 hahu harii Kapela Inan Santa Grasa Wain nebee sei inaugura iha 20 Fevereiru 2025. Kapela nee hetan ona bensaun husi Amu Papa Francisco iha loron 10 Setembru 2024 momentu vizita Timor Leste. Kapela nee sei kompleta ho Gruta Inan Santa Grasa Wain ida iha Kapela oin.
(eme)
