DILI, STLTIMORLESTE.com – Arsebispu Arkedioseze Metropolitana Dili, Dom Virgilio Cardeal do Carmo da Silva, SDB husu sarani sira selebra festa Paskua ho didiak, ho fuan ho laran moos, Paskua bele purifika hodi hametin liu imi nia fiar nuudar sarani.
Dom Virgilio hatete, Paskua nee momentu renovasaun, momentu hanesan tuir semana santa nia laran, ohin tama tridun Paskal, ohin hanoin kona han ikus Jesus ho eskolante sira, ohin kalan mos sei selebra kona-ba Judas nia traisaun, aban ba iha Jesus nia mate no bainrua Sabadu kalan tama Vigilia Paskal no Domingu Resurreisaun.
Tanba liu husi Kuarezma mai Paskua nee sai mos momentu purifikasaun ba sarani sira nia fiar, liu husi akontesimentu grupu neebe dala barak dezafiu sarani idak-idak nia fiar, doko oituan sarani nia fiar, maibe hela ba sarani idak-idak tenke hamriik metin atu keta lao tuir arbiru doutrina oin-oin mai.
“Konvida sarani sira hotu iha tempu Paskua nee mai ita selebra ita nia Paskua didiak hodi reza, hodi halo ita nia via sakra, aban nee sai momentu ida ba ita atu hametin liu tan ita nia fiar, ida nee mak laloran sira neebe kontinua esperensia ita nia moris nuudar igreja,” hatete Arsebispu Arkedioseze Metropolitana Dili, Dom Virgilio Cardeal do Carmo da Silva, SDB iha Câmara Eclesiástica Lecidere, Kinta nee (17/04/2025).
Bibi Atan Uma Kreda nee hatete, igreja maske iha tempu naruk Timor sempre iha buat barak akontese, maibe fiar katak sarani idak-idak hatene nia fiar, sarani idak-idak hadomi nia fiar iha momentu situasaun sira grupu balun mosu.
Dom Virgilio argumenta, sarani iha ninia liberdade tomak atu hatene koalia, defende hamriik iha oin hodi pratika, maibe nafatin fiar neebe nia iha wainhira nia simu batizmu kiik too mai agora.
“Ida nee mak hau nia mensajen, kontinua konvida sarani sira hotu tama iha semana santa prepara aan selebra Paskua didiak ho fuan ho laran moos, Paskua bele purifika hametin liu tan ita sarani nia fiar iha situasaun sira neebe akontese iha rai ida nee,” hatete Dom Virgilio.
(joa)
