AINARO, STLTIMORLESTE.com — Akademista sira kritika makaas hahalok partidu politiku balun neebe hahu tun ba baze hodi hatudu “domin falsu” liu husi aktu rei, hakoak no fahe sasan hanesan supermi, foos, ho mina ba povu, tanba besik ona Eleisaun Prezidensial 2027 no Eleisaun Parlamentar 2028.
Kritika nee foti husi Akademista Universidade da Paz (UNPAZ), Manuel da Silva, neebe konsidera katak, tatika fahe sasan ba populasaun iha tempu badak nee nuudar ajudu temporariu politika deit hodi sosa povu nia votu no explora sira nia kbiit-laek.
“Polítiku sira oportunista ka foer demais, bainhira eleisaun besik foin mak hatene atu rei-liman, hakoak no fahe sasan basa iha interese polítiku. Maibe bainhira asumu tiha kargu, povu nia susar sira haluha tiha hotu,” Manuel da Silva hateten ba STL, liu husi telefone, Kinta nee (20/08/2026).
Nia tenik, pratika sira nee laos hanesan edukasaun polítika neebe diak ba nasaun, maibe hanesan manipulasaun sosiál neebe aproveita situasaun kbiit-laek no kiak iha komunidade nia leet.
Akademista nee husu ba povu atu matan-moris no konsiente, labele troka futuru nasaun nian no direitu votu ho sasan sira neebe labele dura ba tempu naruk.
Iha parte ketak observador polítika, Daniel de Oliveira, sublina katak sosiedade sivil ho akademista sira iha papel boot, hodi hamanas konsiensia sosial no politika iha komunidade nia leet.
“Hau fiar katak, bainhira sosiedade sivil no akademista sira brani fo edukasaun sivika neebe ho kualidade, povu sei sai eleitor neebe krítiku no labele monu deit ba lasu politika oportunista sira neebe mosu deit iha tempu eleisaun,” Daniel de Oliveira afirma.
Daniel hatutan tan katak, valor votu nian mak determinante ba futuru nasaun nian, nunee populasaun sira presiza buka hatene no hamriik metin hodi husu programa dezenvolvimentu neebe ho kualidade husi lider politiku sira, laos sosa no troka deit ho ajudu temporariu iha tempu badak.
Entretantu, iha parte seluk, partidu polítiku sira komesa tun rame-rame ba baze hodi hasoru komunidade sira iha aldeia no suku sira. Sira uza tatika hakbesik an liu husi meiu rei, hakoak, kaer-liman, no fahe sasan bazika hanesan foos, supermi, mina, ho nesesidade loron-loron nian seluk tan ba populasaun sira. Hafoin halo tiha aktu sira nee, sira ho lalais publika fali konteudu vidio no imajen sira nee iha plataforma komunikasaun sosial nian hanesan Facebook, TikTok, no rede sosial seluk tan. Tatika dijital nee sira uza hodi dada atensaun, kria opiniaun publika, no hafanun komentariu husi netizen sira hafoin besik tama ba tinan eleisaun.
(car)
