DILI, STLTIMORLESTE.com – Dosente nain lima (5) husi Institute of Business (IOB) agora daudaun kontinua halao estudu nivel doutoramentu iha Portugal no Brazil, ho apoiu bolsa estudu husi Fundu Dezenvolvimentu Kapitál Umanu (FDCH).
Lia hirak nee hatoo husi Vise Reitor I ba Asuntu Akadémiku IOB, Elizario Nazareth Pinto ba STL iha Kampus IOB Fomentu II, Segunda (24/08/2026).
Elizario esplika, programa bolsa estudu liu-liu ba Portugal no Brazil sai oportunidade importante ba dosente IOB, atu aumenta sira nia kualifikasaun akademika no kapasidade profisionál.
“Ami iha IOB hetan oportunidade liu-liu ba nasaun rua ne’e, hanesan parte husi programa governu neebe kada tinan implementa no fó prioridade ba ensinu superior privadu,” dehan Elizario.
Nia dehan, dosente sira neebe kandidata ba programa nee tenke liu husi prosesu selesaun rigorozu, inklui preparasaun iha língua Português no teste sira neebe determina husi Ministériu no FDCH.
Daudaun nee dosente nain lima husi IOB halao estudu doutoramentu iha rai liur, Dosente nain tolu estuda iha área Informasaun no Teknolojia Komunikasaun (TIK) iha Portugal, ida iha área Ekonomia no Jestaun iha Portugal, no ida seluk halao estudu Kontabilidade iha Brazil.
Elizario hatete, tuir kontratu ho FDCH, períodu bolsa estudu sira nee tenke remata iha Outubru 2026, maibe tanba iha dezafiu balun, inklui problema saúde neebe afeta prosesu estudu, IOB sei husu estensaun ba FDCH too Outubru 2027, atu fó oportunidade ba dosente sira atu finaliza sira nia estudu.
“Kontratu nee hahu iha 2022 no planeadu atu remata iha 2026, maibe iha dezafiu balun kestaun saúde, neebe halo sira presiza tempu tan atu finaliza estudu, tanba nee ami sei halo komunikasaun ho FDCH konaba estensaun too Outubru 2027,” nia hatete.
Aleinde hetan apoiu finanseiru husi FDCH, IOB mos kontinua fo salariu baze ba dosente sira neebe halao estudu iha rai liur, tuir sira nia nível akademiku.
Elizario mos hatete, dosente sira hasoru dezafiu oi-oin durante prosesu estudu iha rai liur, inklui diferensa sistema edukasaun, kultura, klima no barreira língua, maibe dosente sira kontinua halo esforsu atu adapta ba ambiente foun no kumpre sira nia objetivu akademiku.
Tuir nia, investimentu iha kualifikasaun dosente sai parte importante husi estratéjia IOB atu hasae kualidade ensinu no adapta prosesu edukasaun ho dezenvolvimentu teknolojia modernu.
“IOB presiza rekursu umanu ho grau akademiku aas no kualidade diak atu suporta vizaun instituisaun nian, inklui atu kumpre rekezitu sira ba lisensiamentu no akreditasaun ensinu superior,” dehan Elizario.
Nia subliña katak, ho dosente sira neebe iha kualifikasaun no kompeténsia aas, IOB bele hasae kapasidade atu transfere no aplika teknolojia foun, nunee bele produs graduadu sira neebe kompetente no bele fo kontribuisaun ba dezenvolvimentu TL.
IOB, tuir nia planu estratéjiku, sei kontinua investe iha dezenvolvimentu rekursu umanu, liu-liu iha área akadémika, atu asegura kualidade edukasaun no kontribui ba dezenvolvimentu setór ensinu superior iha Timor Leste.
Iha kazu seluk, Elizario mós relata katak iha dosente ida neebe finaliza estudu doutoramentu iha Brazil, maibe depois nia estudu remata, nia la kumpre obrigasaun kontratual atu fila no kontribui ba instituisaun neebe suporta nia.
Dosente nee agora servisu iha fatin seluk, IOB hateten katak prosesu konaba kazu nee sei tuir mekanizmu legal neebe estipula ona iha kontratu entre parte sira.
IOB afirma katak dosente sira neebe simu apoiu ba estudu iha rai liur tenke kumpre obrigasaun kontratual no, hafoin finaliza estudu, fila fali atu kontribui ba dezenvolvimentu instituisaun no ensinu superior iha Timor Leste.
(joa)
