DÍLI, STLTIMORLESTE.com — Dosente Universidade Nasionál Timor Lorosa’e (UNTL), Camilo Ximenes Almeida kestiona politika Governu kona-ba investimentu edukasaun, liuliu oportunidade ba dosente ne’ebé remata estudu iha liur atu servisu iha rai laran.
Dosente Fakuldade Siénsia Sosial (FSS), Universidade Nasionál Timor Lorosa’e (UNTL) hato’o pozisaun ne’e ba STL iha Kampus UNTL, Segunda (21/09/2026).
Nia dehan, Governu investe barak haruka dosente ba liur, maibé seidauk iha politika klaru atu utiliza sira nia koñesimentu bainhira fila mai.
“Ita investe iha ita nia rain, porezemplu lisensiatura, maibé bele loke nivel aas liu, hanesan mestradu no doutoramentu,” nia dehan.
Nia hatete, UNTL hahú iha 2000 no agora iha ona doutor barak, maibé universidade sei hasoru difikuldade atu loke programa mestradu.
“Kuandu universidade iha ona tinan 27, pelumenus tenke iha rekursu doutoramentu ne’ebé bele suporta abertura programa mestradu,” nia hatete.
Nia kritika katak investimentu iha edukasaun seidauk sufisiente, inklui fasilidade no kualidade ensinu, tanba programa bolsa estudu seidauk liga ho nesesidade rai laran.
“Ita nia investimentu oituan liu iha rai laran. Fo bolsa tinan tolu ka haat, ema fila lalais, maibé fila mai halo saida, la hatene,” nia dehan.
Tuir nia, durante tinan 27 Governu haruka sidadaun barak estuda iha liur liuhusi FDCH no instituisaun seluk, maibé mekanizmu atu absorve sira seidauk efetivu.
“Ita investe, depois ema akaba estudu, maibé ema ne’e abandona tiha deit,” nia dehan.
Nia fó ezemplu katak balun ne’ebé remata estudu iha Portugal hili atu buka oportunidade servisu iha Irlanda, tanba oportunidade servisu iha rai liur.
“Governu halo tiha investimentu, maibé laiha kapasidade atu utiliza fila fali ema sira ne’ebé nia investe,” nia hakotu.
Nia sujere IX Governu dezenvolve politika adekuadu atu fó oportunidade ba akademiku sira, hadi’a fasilidade no hasa’e kapasidade dosente iha UNTL.
Relasiona ho asuntu ne’e, jornalista koko atu hetan konfirmasaun husi parte FDCH, maibé parte refere seidauk iha disponibilidade atu fó resposta.
(joa)
