DILI, STLTIMORLESTE.com – Relasiona ho publiku sira nia preokupasaun kona-ba lista kandidatu admitidu ba formasaun Ofisial Justisa Defensor Publiku nian husi numeru 1 too 10, tuir informasaun la liu husi teste, ikus mai naran publika iha Jornal Republika, mak Defensor Publiku Jeral (DPJ) fo nia klarifikasaun.
Tuir Defensor Publiku Jeral, Cansio Xavier katak, Dekretu lei numeru 19/2012, loron 25 Abril konaba Ofisial Justisa sira nia estatutu hateten katak, funsionariu sira neebe servisu iha entidade tolu, tantu Prokurador, Tribunal, no Defensoria nia ajente sira neebe servisu temporariu sira ultrapasa tinan ida, sira bele ba tuir formasaun.
“Lei ofisial justisa hateten kuandu sira servisu tinan ida liu iha Defensor Publiku, kontribui tiha ona servisu iha DP lei nee hateten, sira bele ba tuir formasaun,” dehan Cansio ba STL iha Kaikoli, Segunda (18/05/2026).
Nia esplika, lei nee fo dalan atu sira bele tuir formasaun iha Sentru Formasaun Juridiku no Judisiariu (SFJJ), maibe kuandu iha formasaun sira nia valor la too, signifika sira esklui ona ka la pasa ba iha Ofisial Justisa Defensor Publiku nian.
Cansio afirma, sira nain 10 antes nee servisu hanesan Ofisial Justisa temporariu iha Defensor Publiku, momentu neeba rekruta husu ba iha Funsaun Publiku aprova. No instituisaun la utiliza ho forma mesak, no sira neebe nyudar ajente Administrasaun Publiku nee laos iha nia tempu deit, iha eis Defensor Publiku Jeral nia tempu sira mai, hetan rekruta sai hanesan Ofisial Justisa temporariu.
Nia dehan, rekruta sira laos desizaun mesak husi Defensor Publiku, maibe momentu kontratu ba sira Defensor Publiku sei tutela hela iha Ministeriu Justisa, no husu Ministeriu Finansa no Funsaun Publiku hodi halo kontratu ba sira nia pozisaum temporariu nee, husu ba iha Funsaun Publiku autoriza.
Konkursu neebe iha nee Defensor Publiku Jeral nuudar Prezidente Konselhu lori ba iha Konselhu hodi deside, no Konselhu nee mai husi reprezentante husi Palasiu Prezidente, reprezentante husi Parlamentu Nasional, husi Governu nia reprezentante, no mai husi mos Defensor Publiku nia reprezentante.
Tuir dadus neebe iha, ajente ofisial Justisa temporariu hamutuk nain 10, no kandidatu neebe tuir teste hamutuk nain 13, husi numeru nee kandidatu hamutuk nain 23 maka naran publika ona iha Jornal da Republika, hodi ba tuir formasaun iha Sentru Formasaun Juridiku no Judisiariu (SFJJ).
Iha fatin ketak, Akademiku UNTL, Rafael de Jesus dehan, konkursu neebe loke tuir lolos antes nee fo ona informasaun, atu ikus mai labele hamosu duvidas.
“Hau hanoin tuir lolos antes konkursu nee lao, husi parte Defensor nian esplika ona ba kandidatu sira, atu nunee rezultadu ikus labele hamosu duvidas iha publiku,” dehan nia.
Afirma tan, se durante teste lao la iha esplikasaun neebe klaru, ikus mai naran balu mosu iha lista, hamosu duni duvidas.
Tanba nee husu ba iha DPJ, atu fo esplikasaun neebe klaru ba kandidatu sira neebe liu ona, no mos sira neebe la liu, atu labele hamosu duvidas iha sira.
(ter)
