DILI, STLTIMORLESTE.com – Polisia Nasional Timor Leste (PNTL) liu husi Diresaun Tranzitu Seguransa Rodoviária Nasional (DTSRN) halao atividade pasa revista iha kapital Dili ba transporte publiku sira, maibé husu ba kareta nain tenke tau atensaun ba uniferme neebe la merese motorista sira uza hodi halao movimentu.
“Durante nee ita observa haree katak iha motorista barak, liu-liu transporte publiku sira nee, sira utiliza uniferme nee mak la merese ona atu uza, tanba nee ita ezije kareta nain sira atu bele tau atensaun ba uniferme neebe motorista sira uza,” dehan Diretor Diresaun Tranzitu Seguransa Rodoviária Nasional (DTSRN), Superintendente Assistente, Luis da Costa ba jornalista sira iha Komando Jeral PNTL, Dili, Kuarta (12/03/2025).
Nia tenik, iha semana kotuk liu komandante Jerál PNTL Komisariu Jerál Polísia, Henrique da Costa orienta ona oinsa atu bele halo koordenasaun ho DNTT atu bolu Mikorlet transporte publiku sira neebe halao movimentu iha sidade Dili. Sei bolu sira mai halo diskusaun kona-ba motorista sira nia komportamentu.
“Transporte publiku sira nee laos Timoroan deit mak sae, maibe ita haree mos ema husi estranjeiru mos utiliza, ida nee sai preokupasaun nuudar Timoroan, liu husi linha koordenasaun ho DNTT, tanba sira mak hasai tipu uniforme, ho nunee ita espera katak DNTT bele tau atensaun urjente, tanba maioria transporte publiku sira nia uniferme nee fo imajen neebe ladun diak ba TL,” dehan nia.
Nia deklara, kareta nain labele kalan-kalan hein simu deit reseitas neebe motorista sira hatama, maibé performa motorista sira importante, oinsa pasajeiru sira bele livre, sira konfortavel, hetan tratamentu ida neebe diak iha kareta laran.
“Ita sei esforsu bolu hotu kareta nain sira nee, hodi bele halo diskusaun, tanba tuir informasaun katak, uniferme nee perepara husi kada motorista idak-idak, ida nee hau senti ladun diak, maibé ita diskute hamutuk, sei kareta nain lakohi kumpri ida nee ita bele rekomenda ba iha DNTT para bele hapara ninia kareta lisensa trazitu nee, para labele halo movimentasaun, tanba ida nee imajen ba nasaun TL,” nia koalia.
Iha fatin ketak, Motorista Filipe da Costa lori Mikorlet 03 informa, uniferme neebe sira utuliza laos kareta nain mak fo ba sira, nomos laos husi DNTT, maibe sira rasik hasai osan hodi ba suku uniferme nee.
“Uniforme neebe ami uza nee laos husi DNTT ou laos husi kareta nain, maibé ami mak hasai osan rasik hodi ba suku no uza ba servisu, maibe modelu nee DNTT mak fo, ami ba suku tuir deit, tanba nee nakles mos ami mak hatais, ami osan laiha atu suku fali foun,” nia afirma.
(jen)
