DILI, STLTIMORLESTE.com – Durante nee mediku Kubanu neebe mak halo kolaborasaun ho medidu Timoroan sira fo tratamentu ba pasiente lubuk ida iha Timor Leste.
Kestaun nee hatoo husi Embaixadora Kuba iha Timor Leste, Grisel Alina Aldama Inniss liu husi nia diskursu bainhira akompanha Prezidente Republika Jose Ramos Horta entrega sertifikadu Rekonhesimentu ba mediku Brigada Medika Kubanu nain 66 neebe remata sira nia misaun tinan 2 iha Timor Leste, iha Galeria Memoria Viva iha Bairo Farol, Dili Kinta lokraik (10/04/2025).
“Durante tinan sira Kolaborasaun medika nian, maizumenus pasiente 15,583,225 mak hetan ona tratamentu, inklui partu 108,774, sezariana 13,662, operasaun 159,735, partu moris 96,096 no moris 52.065 mak salva ona,” dehan Embaixadora.
Embaixadora dehan, husi numeru sira nee mediku sira nia servisu neebe louvavel nuudar guardiaun metin ba povu Timor nia saude.
“Ami hatoo parabens ba ami nia kuadru mediku sira no ba kolaborasaun Kubana tomak neebe servisu besik ba programa sira neebe kontribui ba povu Timor nia moris diak,” katak nia.
Aleinde nee, formasaun Rekursu Umanu sai hanesan fatuk inan ida ba kolaborasaun, hodi kumpri promesa neebe líder istoriku revolusaun Kubana nian halo.
Fidel Castro Ruz, forma doutor rihun ida ba Timor Leste. Iha loron 5 fulan Dezembru tinan 2005. Eskola Medisina iha Universidade Nasional Timor Lorosae hetan inaugurasaun. Tinan ida nee marka aniversariu ba dala 20, ho mediku Timoroan hamutuk 1,470 neebe mak hein atu hetan graduasaun.
Nia hatutan, importante mos atu rekonhese katak mediku Timoroan nain 47 mak oras nee halao hela espesialidade mediku iha Havana liu husi fornesedor servisu mediku Kubanu.
Nia haktuir tan katak, Kubanu ho Timor Leste sei kontinua hametin projetu ida nee, liu-liu rekonhese sira neebe lori ona responsabilidade ida nee husi Estadu no Governu Timoroan iha etapa hotu-hotu.
Prezidente Republika Jose Ramos Horta mos rekonhese katak durante nee Timoroan lubuk ida mak estuda medisina iha Kuba, no Kuba nia apoiu ba Timor Leste iha area saude boot tebes.
Iha biban nee, Prezidente Republika hatoo gradese prezensa mediku Kunanu sira nia iha Timor Leste neebe fo ona tratamentu ba pasiente Timoroan.
”Prezidente hatoo agradese ba profisional mediku sira ho kualifikasaun, liu husi sira nia atendimentu ba povu Timor Leste neebe hatudu ona ideal aas liu husi solidariedade internasional.
Mediku Kubanu hametin ona sistema kuidadu saude, salva ona vida sira no transfere konhesimentu folin ba profisional mediku Timoroan sira. Sira nia dedikasaun hodi servi komunidade sira neebe remota liu reprezenta amizade neebe metin entre Kuba no Timor Leste.
(eme)
