DILI, STLTIMORLESTE.com – Governu liu husi Ministeriu Saúde (MS) implementa ona Pilotu konaba E-Tracker Imunizasaun iha Sentru Saúde Comoro (SSC) lao susesu tebes.
Diretora Saúde Materna Infantil iha MS, Madalena da Costa Pinto Gomes hatete, Governu liu husi MS implementa ona programa E-Tracker Imunizasaun nee halao iha SSC lao ho susesu diak los.
“E-Tracker Imunizasaun nee ita pilotu iha Sentru Saúde Comoro lao susesu los,”.hatete Diretora Saúde Materna Infantil Iha MS,Madalena da Costa Pinto Gomes ba STL iha Hotel Novu Turismu Dili, kinta feira (02/07/2026).
Nia tenik, E-Tracker Imunizasaun nee bele mos rekorda dadaus konaba imunizasau ninia, album nee deterima iha Sentru Saúde Comoro rejistu hotu iha sistema.
“Programa ida nee mos fo vantajen nomos fo oportunidade ba ita nia pesoal saude sira atu bele buka tuir labarik sira neebe mak la mai hodi hetan imunizasaun,” nia informa.
Nia esplika, sistema ida neebe bele fo oportunidade ba Pesoal Saúde sira oinsa halo planu neebe mak propriadu, liu-liu ba labarik sira neebe mai imunizasaun maibe sidauk hotu ka la kompletu, tanba nee ho sistema ida nee hahu pilotu iha Sentru Saúde Comoro lao ho susesu.
“Ita espera katak ita bele lori ba oin nomos bele too iha Munisipiu, tamba sistema ida nee ita bele hetan labaraik hira mak hetan ona imunizasaun no hira mak hotu, tanba nee sistema dijitalizasaun nee fasilita teb-tebes ba pesoal saude sira,” nia informa.
Iha fatin hanesan, Rita Pires husi bebe deklara , imunizasaun ba labarik iha SSC sei la uza livru lisun, maibe rejistu ho sistema online, tanba nee agradese tebes ba Ministeriu Saúde (MS) nia programa furak ida nee.
“Hau ohin lori labarik mai imunizasaun, maibe la uza ona livru lisun neebe baibain ita uza, maibe uza sistema dijitalizasaun, tanba nee ita agradese tebes ba governu, ita uza sistema la persiza rai ona surat tahan, tanba ita uza surat tahan tenke rai didiak tauk lakon no tauk inundasaun depois bee lori,” nia afirma.
(jen)
