DILI, STLTIMORLESTE.com – Eskola Basico Central (EBC) Farol tinan nee hatun ka hamenus numeru estudante sira husi anterior 1.834 tun bá 1.795, ho razaun atu hasae kualidade edukasaun iha eskola refere.
Diretora EBC Farol, Brigida Faustina Soares Guterres Coelho hatete, total alunus iha tinan kotuk ho tinan agora la hanesan. Iha tinan kotuk 2025 nian alunus hamutuk 1.834, bá tinan nee menus no hatun tiha bá 1.795.
Nia dehan, numeru estudante iha tinan nee menus no tun, husi eskola mak hakarak hamenus duni.
“Ho intensaun tanba anteriormente kada sala de aula nee ami akumula estudante hamutuk 50 too 60 hanesan nee, maibe agora eskola tarjetu kada sala nee 45 mai kraik deit, labele liu husi nee maske eskola nee sentru. Para nunee bele hasae kualidade edukasaun nian nee iha, neebe agora iha sala laran nee la liu husi 45 pesoas,” dehan nia bá STL iha Farol, Segunda (01/06/2026).
Nia hatete, iha sala ida iha 41 no 42 pesoas hanesan nee, la liu husi 45 ho rajaun hasae kualidade edukasaun nian, no profesor sira neebe iha eskola nee sufisienti. Profesor sira neebe reforma iha tinan nee hamutuk 11 inklui mós ho sira neebe mate tiha ona. Profesor iha EBC Farol nee bele dehan sufisienti ona, tanba eskola simu ona profesor bolsa kandidatu hahu husi etapa primeiru, iha 2025 nian mos simu no foin lalais Fevreiru 2026 nee mos simu tan, neebe sufisiente ona. Bolsa kandidatu sira neebe eskola simu iha 2026 nee taka kedas sira neebe reforma nia fatin.
Entretantu material eskola nian hanesan meza no kadeira neebe simu iha tinan kotuk nian mak nafatin uza hela, neemak foin lalais nee eskola halo ona pedidu bá Ministériu Edukasaun.
“Foin lalais nee hau hatoo ona pedidu hodi troka fali kadeira no meza foun, neebe ami hein deit mak despaisu haruka mai dehan troka, entaun ami prontu hodi troka ona. Neebe agora dadaun nee laiha problema bá meza no kadeira. Kadeira no meza sufisienti hela maibe balun mak tuan no aat dadaun ona, entaun nee bele difikulta labarik sira nia konsentrasaun. Ho ida neemak hau hasae ona pedidu, hein deit resposta mai,” nia tenik.
Nia hatutan, kona bá konsesaun eskolar nian eskola nee ezekuta nafatin tuir matadalan nian katak buat neebe lei no matadalan fo lao tuir ida nee, ida neebe dehan labele eskola lei lslao tuir Ida nee.
Konsesaun eskolar hodi sosa kadeira, meza no armari ba Professor sira hodi uza. Sosa armari para profesor sira tau kaderneta sira, tau livru manual ho meza tur hodi tau sira nia sasan iha tempu bainhira rekreu ka deskansa nian.
“Foin lalais tinan kotuk nee hola ona meza ho armari, inklui mós iha hau nia fatin sosa mos armari no iha GAT nia fatin mós sosa armari. Depois bá Profesor bolsa kandidatu foun sira, hau hanoin mos atu sosa bá sira. Iha primeiru periodu nee hasae tiha ona, agora hanoin hela atu halo pedidu konsesaun eskolar bá segundu periodu nian nee para hodi sosa fali bá Professor foun sira foin mai nee, para bainhira sira deskansa karik bele tau sira nia kadernu bá meza no armari,” nia dehan.
Nia haktuir, orsamentu bá konsesaun eskolar nee tuir alunus ida hetan US$ 2 kada alunus. Total seidauk hatene, proposta mak halo hela nee maibe kona bá montante osan nee seidauk hatene, neebe eskola hein deit aprova ona planu sira depois foti TPO mak foin hatene total nee hira.
Entertantu programa merenda eskolar iha nee, eskola ezekuta tuir mata dalan no menu neebe uza sei lao nafatin ho anterior nian. Neebe atividade merenda eskolar iha nee lao normal hela. Menu neebe iha mak hanesan nan bifi, etu, modo tahan no aifuan, nee nafatin lao tuir menu tinan kotuk nian.
(dom)
