DÍLI, STLTIMORLESTE.com – Eskola Ensinu Básico Católica Santa Bernadette Soubirous Aimutin hala’o programa study tour kada tinan, hodi aumenta estudante sira-nia koñesimentu no esperiénsia.
Diretora EBC Santa Bernadette Soubirous Aimutin, Me. M. Misella hato’o informasaun ne’e ba STL iha Aimutin, Kinta (1/10/2026).
“Ami iha programa ida hanesan Study tour halao kada tinan hodi aumenta koñesimentu no esperiénsia estudante,” hatete Me.
Me. Misella hatete, programa study tour ne’e hala’o kada tinan ba klase sira, liu liu depois estudante sira remata ezame períodu.
Iha atividade ne’e, estudante sira vizita fatin edukativu, inklui Empreza Caltech iha Beduku, Comoro, no Chega.
Programa study tour ne’e hahu hala’o desde 2024 to’o agora, ho objetivu atu aumenta estudante sira-nia koñesimentu no fó esperiénsia prátika liu husi observasaun direta iha fatin.
Iha vizita ba Kompania Caltech estudante sira aprende kona-ba jestaun fo’er no kuidadu ambiente, inklui oinsá fo’er la bele soe arbiru, maibé tenke tau iha fatin ne’ebé apropriadu no bele fó benefísiu ba moris no ekonomia.
Estudante sira mós aprende kona-ba separasaun fo’er tuir ninia tipu, hanesan botol plastik, fo’er orgániku no fo’er inorgániku.
Prátika ne’e komesa husi ambiente eskola rasik, hodi estudante sira bele komprende no aplika iha moris loroloron.
Eskola mós servisu hamutuk ho Empreza Caltech hodi prepara kontentór fo’er boot iha eskola.
Botol plastik mamuk ne’ebé uza husi estudante sira sei tau iha kontentór, no bainhira nakonu, ekipa Empreza Caltech sei foti hodi prosesamentu ka jestaun tuir prosedimentu.
Aleinde aprendizajen kona ba ambiente, estudante sira ne’ebé vizita Sentru Nasional Chega, hetan oportunidade atu aprende kona-ba istória Timor-Leste no komprende liután kona-ba eventu importante sira iha istória nasaun.
Diretora hatete, maneira aprendizajen liuhusi study tour sei kontinua komplementa matéria ne’ebé estudante sira aprende iha sala aula.
“Aprende iha fatin, depois kontinua aprende iha eskola,” hatete Me. Misella.
(joa)
