BAUCAU, STLTIMORLESTE.com – Eskola Ensinu Baziku Sentral (EBC-sigla português) Vila Nova iha Munisipiu Baucau, seidauk implementa programa merenda eskolar faze terseiru nian.
Diretor EBC Vila Nova Baucau, Francisco Pinto hatete, programa implementasaun merenda eskolar iha EBC Vila Nova atinji ona loron efetivu 70 kompostu responde ba Primeiru Periodu kompleta loron efetivu 30 no Segundu periodu kompleta loron efetivu 40, maibe hafoin remata segundu periodu programa merenda eskolar iha eskola refere mos paradu too ohin loron seidauk implementa hikas programa refere.
“Kona-ba merenda eskolar foin dadauk kolega sira hatama relatoriu atrazu entaun osan mos sai atrazu, maibe osan iha tiha ona ohin hau telefone ona ba tejoreiru sira atu ba foti osan para segunda oin bele implementa fali ona,” hateten Francisco Pinto ba STL iha EBC Vila Nova Baucau, Tersa (18/08/2026).
Nia informa, implementasaun programa merenda eskolar ba anu letivu 2026 tuir menu indikativu neebe iha mata dalan implementasaun programa refere, estudante sira konsumu aihan husi produtu importadu 25% no 75% ba produtu lokal koresponde ba loron efetivu 150.
Nia fundamenta, durante implementasaun merenda eskolar iha eskola EBC Vila Nova Baucau, parte fornesedor sira kumpri deit ba mata dalan implementasaun, maibe parte eskola preokupa mak loron efetivu ba implementasaun programa refere, tanba husi implementasaun programa refere foin koresponde ba loron efetivu 70.
“Loron efetivu terseiru nian nee hira karik nee ami seidauk hatene, tanba alokasaun kalendariu implementasaun nee sira Edukasaun mak hatene. Tanba implementasaun nee sira Edukasaun mak halo orariu ami implementa tuir deit orariu neebe iha,” Francisco katak.
Liga asuntu nee STL tenta konfirma Diretor Servisu Munisipal Edukasaun Baucau, maibe laiha fatin atu fo komentariu.
Entertantu, estudante benefisiariu ba programa merenda eskolar iha EBC Vila Nova Baucau hamutuk nain 795 kompostu setimu anu, oitavu anu no nonu anu.
(tom)
