BAUCAU, STLTIMORLESTE.com — Ensinu Baziku Filial (EBF) Buruma simu vizita illas São Calisto Caravario atu inspira estudante tuir nia ezemplu moris no servisu.
Koordenadór EBF Buruma, Henrique Freitas da Costa, agradese ba Pároku Paróquia Santo António Baucau, liuhusi Zona Pastoral Buruma.
Nia hateten, prezensa illas São Calisto Caravario fó oportunidade ba estudante sira atu komprende nia moris no dedikasaun ba edukasaun.
“Prezensa illas ne’e bele sai fonte motivasaun ba estudante atu aprende no tuir modelu moris São Calisto Caravario,” hateten Henrique ba STL iha Buruma hafoin remata seremonia agradesimentu, Domingu kalan (04/10/2026).
Vizita ne’e realiza iha atividade pastorál no edukasaun, ho objetivu aproxima estudante sira ho figura São Calisto Caravario.
Henrique hateten, eskola aproveita oportunidade ne’e iha Sábadu lokraik, antes entrega fali illas ba Sentru Dokobere Kraik.
“Estudante sira bele halo tuir nia hahalok no atividade ne’ebé nia halo husi ki’ik to’o sai Santo,” hateten Henrique.
Nia mós hateten, estudante sira rona esplikasaun kona-ba moris, misaun no kontribuisaun São Calisto Caravario ba edukasaun.
“Illas São Calisto iha ne’e, estudante sira rona esplikasaun husi Padre sira liuhusi omelia,” hateten Henrique.
Henrique espera prezensa illas ne’e bele haburas interese estudante sira ba edukasaun, disiplina, servisu no responsabilidade sosial.
São Calisto Caravario durante misaun iha Timor-Leste, entre 1927 to’o 1929, liuliu iha Dili, fó atensaun ba edukasaun.
Nia involve iha atividade edukativu no pastorál hodi akompaña, orienta no ajuda jovem sira dezenvolve kapasidade.
Iha Dili, São Calisto mós involve iha esforsu atu haburas eskola arte no ofísiu ba formasaun jovem.
Edukasaun ba nia la’ós de’it aprendizajen, maibé mós formasaun karakter, responsabilidade no prontidaun atu servisu ba komunidade.
Iha fatin hanesan, Padre Abrão Soares Pinto SDB haktuir São Calisto moris iha família simples no nakonu ho virtude.
Padre Abrão hateten, São Calisto sai ezemplu mestri di’ak tanba hatudu pasiénsia, obediénsia no prontidaun hala’o misaun.
“Ida ne’ebé halo ha’u admira liu, nia la kontra ema ne’ebé haruka nia; haruka ba ida-ne’e, nia ba,” hateten Padre Abrão.
Tuir Padre Abrão, obediénsia no pasiénsia São Calisto la’ós buat fasil, maibé sai ezemplu importante ba estudante.
Nia subliña, ensinamentu São Calisto kona-ba rona malu, respeitu no obediénsia relevante ba estudante, família no komunidade.
“São Calisto hanorin ita atu rona malu. Buat di’ak liu, família hotu tau Maromak nu’udar sentru iha vida,” hateten Padre Abrão.
Vizita ne’e mós sai momentu ba estudante no manorin atu reflete kona-ba edukasaun, karakter no servisu ba ema seluk.
Padre Abrão konvida komunidade atu aprende husi atitude São Calisto, liuliu kona-ba fidelidade no prontidaun ba misaun.
Atualmente, EBF Primeiru, Segundu no Terseiru Siklu Buruma iha total estudante na’in 527, ho profesór hamutuk na’in 18.
(tom)
