DÍLI, STLTIMORLESTE.com – Ministériu Obras no Públikas (MOP) liu husi Eletrisidade Timor-Leste (EDTL, E.P.) no Korporasaun Finansas Internasional (IFC), parte husi Grupu Banku Mundial, asina akordu Transaction Advisory Services Agreement (TASA) ba preparasaun projetu energia anin (wind power) sei implementa iha Larigutu, Ossu, Munisípiu Viqueque, no Oeleo, Bobonaro, Munisípiu Maliana.
Hatete Prezidente EDTL, Paulo da Silva ba jornalista sira iha Salaun MOP, Tersa-feira (6/10/2026).
Prezidente EDTL, Paulo da Silva hatete katak, akordu ne’e importante atu IFC fó asisténsia téknika ba EDTL, liuliu iha preparasaun dokumentus konkursu ba projetu energia anin.
“Asina akordu ida kona-ba asisténsia téknika husi ekipa IFC mai EDTL, ligadu ho planu implementasaun projetu energia wind power iha Larigutu, Ossu, Munisípiu Viqueque, no Oeleo, Bobonaro, Munisípiu Maliana.
Estudu viabilidade hahú tiha ona tinan kotuk, no agora IFC sei fó asisténsia téknika kle’an liu ba preparasaun dokumentus konkursu,” Paulo da Silva hatete.
Nia hatete, ho asisténsia ne’e, EDTL espera bele hahú prosesu konkursu iha tinan 2027, no se prosesu lao tuir planu, iha meadu ka finál 2027 bele konklui preparasaun no asina Power Transaction Agreement.
“Tinan oin ita bele lansa ona konkursu. Se tarde, meadu tinan oin konkursu bele lao, no iha finál 2027 ita bele asina Power Transaction Agreement,” nia dehan.
Paulo mós hatete katak, orsamentu projetu seidauk determina, tanba prosesu preparasaun estimasaun téknika sei lao hela.
Nia esplika katak, modalidade projetu ne’e sei konsidera hanesan projetu energia solar (PV) iha Laleia, ho setor privadu mak sei halo investimentu ba produsaun energia, ho apoiu IFC iha prosesu preparativu.
Reprezentante Banku Mundial iha Timor-Leste, David Freedman, hatete katak akordu asesoria entre IFC no EDTL, tutela MOP, estabelese asisténsia téknika husi IFC ba EDTL atu prepara projetu ne’ebé bele dezenvolve liu husi investimentu setor privadu.
Nia hatete, asisténsia ne’e sei ajuda EDTL no Governu atu atinji metas no objetivu sira ne’ebé define iha Planu Médium Prazu 2027–2030, ne’ebé foin aprova no lansa husi Primeiru-Ministru.
Tuir David Freedman, ekipa téknika IFC sei servisu hamutuk ho EDTL atu halo estudu kle’an kona-ba posibilidade dezenvolvimentu projetu eletrisidade iha Larigutu, Munisípiu Viqueque, no Oeleo, Munisípiu Maliana.
“Iha fatin rua ne’e, ami ekipa konjunta monta torre ho altura 100 metru hodi sukat área. Depois prosesu sukat, ami sei prepara planu EDTL kona-ba projetu ne’e. Bainhira prontu, bele lansa ba konkursu no liu husi prosesu nakloke bele mobiliza investidór sira,” David Freedman hatete.
Nia mós kompara projetu energia anin ne’e ho modelu projetu energia solar iha Laleia, Munisípiu Manatuto, ne’ebé lansa iha fulan Jullu 2026.
David Freedman hato’o apresiasaun ba EDTL, MOP no ekipa hotu ne’ebé servisu maka’as hodi lori prosesu preparasaun to’o iha etapa asinatura akordu TASA.
Entretantu, Ministru Obras no Públikas (MOP), Samuel Marçal hatete katak, projetu energia anin iha Larigutu no Oeleo parte husi planu estratéjiku Governu ba dezenvolvimentu energia renovável iha Timor-Leste.
“Ohin ita asina tan akordu ida.
Fulan hirak ba kotuk ita hahú ona projetu iha Laleia, agora ita ba tan ida ne’e atu utiliza energia anin. Ida ne’e hanesan mehi ida no planu estratéjiku tinan naruk, ne’ebé ita foin hahú halo implementasaun,” Samuel Marçal hatete.
Nia apresia esforsu husi ekipa téknika, Prezidente Republika, Banku Mundial liu husi IFC no EDTL ne’ebé servisu hamutuk atu hala’o estudu no prepara projetu ne’e.
Ministru hatete katak, realizasaun projetu sira hanesan energia anin no energia solar presiza servisu maka’as, maibé nia espera akordu TASA bele ajuda Governu hahú ona pasu konkretu iha tempu badak.
“Hau espera katak ho akordu ida ne’e ita bele hahú ona buat balun iha tempu badak, atu ajuda ita nia Governu iha energia eletrisidade,” nia dehan.
Samuel Marçal subliña katak, utilizasaun energia husi anin no loro-matan bele ajuda hamenus orsamentu ba produsaun eletrisidade.
Nia hatete, eletrisidade mak infraestrutura no nesesidade bázika ne’ebé ema hotu presiza, tanba energia eletrisidade ne’ebé sufisiente bele ajuda dudu setor sira seluk atu funsiona ho di’ak.
“Tanba ne’e, energia eletrisidade importante tebes-tebes. Ita hotu tenke tau atensaun máximu ba ida ne’e,” nia afirma.
(joa)
