DÍLI, STLTIMORLESTE.com — Eletrisidade Timor-Leste (EDTL) husu komunidade atu kontaktu servisu tékniku bainhira presiza liga eletrisidade, hodi prevene risku inséndiu.
Prezidente EDTL, Paulo da Silva hato’o pedidu ne’e ba jornalista sira iha Salaun Ministériu Obras Públikas, Tersa-feira (6/10/2026).
Paulo hatete, nia seidauk bele konklui kauza inséndiu sira, tanba ema ida-idak bele iha justifikasaun kona-ba akontesimentu ne’e.
Nia hatete, realidade iha terenu hatudu katak iha fatin barak ema la’ós tékniku eletrisista profisionál mak halo koneksaun eletrisidade.
“Realidade iha ita nia rai hatudu katak la’ós hotu-hotu mak tékniku eletrisista,” Paulo dehan.
Tuir Paulo, koneksaun eletrisidade la tuir padraun tékniku bele hamosu problema, liuliu bainhira laiha kontrolu adekuadu.
Nia husu komunidade atu evita halo koneksaun mesak, liuliu bainhira presiza liga eletrisidade ba uma ka instalasaun foun.
“Bainhira presiza liga ahi, mai kontaktu EDTL. Labele ida-idak liga ahi, depois serkuit ahi han uma,” nia afirma.
Paulo hatete, koneksaun liuhusi EDTL iha mekanizmu no regra atu garante prosesu ligasaun tuir padraun tékniku no seguransa.
Nia mós husu komunidade atu la lalais foti konkluzaun ka fó kulpa bainhira inséndiu akontese, antes investigasaun determina kauza.
“Bainhira akontese inséndiu, labele lalais fó kulpa ba malu antes iha investigasaun kona-ba kauza,” nia hatete.
Entretantu, reprezentante komunidade, Augostinho Ximenes, apoia pedidu atu komunidade kontaktu EDTL antes halo koneksaun eletrisidade.
Nia hatete, komunidade balun seidauk hetan fornesimentu eletrisidade, no sira kontinua hein EDTL estende asesu eletrisidade ba sira.
(joa)
