DILI, STLTIMORLESTE.com – Maske durante tempu ne’e iha anin boot, to’o agora Servisu Edukasaun Munisipiu Ainaro seidauk simu informasaun husi eskola sira kona-ba edifísiu eskola ne’ebé estraga tanba anin.
Diretór Servisu Edukasaun Munisipiu Ainaro, Patricio da Costa Magno, hato’o informasaun ne’e ba STL liu husi via telefóne, Kuarta nee (09/09/2026).
“Hau hanoin asuntu kona-ba eskola hetan estragus husi anin boot, to’o agora Edukasaun Ainaro ami seidauk simu informasaun ruma mai husi ita-nia eskola sira. Nune’e mós, ami-nia klima dadaun diak hela. Bainhira ami-nia eskola hetan estragus ruma husi anin, eskola sira relata informasaun mai ami, atu ami bele hatene,” nia esplika.
Tuir nia, Servisu Edukasaun Munisipiu Ainaro seidauk iha dadus kona-ba eskola ne’ebé estraga tanba anin, tanba seidauk simu relatóriu husi eskola sira.
Maibé, nia hatete katak iha eskola balun ne’ebé presiza reabilitasaun no konstrusaun foun, atu fasilita estudante sira iha prosesu ensinu no aprendizajen.
“Antes ne’e ita-nia eskola ida rua mak hetan estragus ki’ik, no husi ME fó apoiu ona material emerjénsia hodi hadia tiha ona. Kuandu ita-nia eskola hetan estragus, ita halo pedidu no hato’o ba nasional, no sira fó kedas apoiu material hanesan kalen no besi, depende ba eskola ne’ebé hetan estragus no kondisaun estragus nian,” nia informa.
Iha fatin seluk, Diretór Servisu Edukasaun Munisipiu Bobonaro, Miguel Freitas, hatete katak to’o ohin loron sira seidauk simu informasaun husi dirijente eskola sira kona-ba eskola ne’ebé estraga tanba anin.
“Iha Bobonaro dadus laiha, no laiha eskola ne’ebé hetan estragus husi anin, tanba ita-nia eskola sira seidauk fó informasaun ba ami. Bainhira laiha informasaun, ne’e laiha eskola ne’ebé hetan estragus husi anin,” nia dehan.
Enkuantu ne’e, Diretór Diresaun Nasional Edukasaun Inkluzivu no Asaun Sosial Eskolar (DNEIASE), Fernando Soares, hatete katak sira foin dadaun simu pedidu husi munisipiu sira, no ME distribui ona material emerjénsia hanesan kalen, baut no besi ba eskola ne’ebé hetan estragus.
(jac)
