DILI, STLTIMORLESTE.com – Família, liuliu inan-aman ne’ebé iha oan ho kondisaun defisiénsia, labele husik sira iha uma de’it, maibé tenke fó apoiu no lori sira ba eskola, tanba edukasaun importante ba sira nia futuru.
Juliana Nunes Maia, ne’ebé moris ho kondisaun defisiénsia, hatete ba STL iha Ministériu Edukasaun, Kinta-feira (24/09/2026), katak nia konsege kontinua estudu tanba hetan apoiu no motivasaun hosi inan-aman.
“Maske hau oan ne’ebé ho defisiénsia, maibé inan-aman la husik hau iha uma. Sira motiva hau atu ba eskola, no hau bele eskola hamutuk ho maluk sira seluk. Hau remata estudu iha tinan kotuk, no agora hau mai legaliza hau nia diploma iha Ministériu Edukasaun, tanba oan hotu-hotu tenke asesu ba edukasaun,” dehan Juliana.
Nia agradese ba inan-aman ne’ebé durante ne’e fó apoiu tomak ba nia estudu to’o remata nivel sekundáriu. Nia mós hatete katak iha tinan oin nia iha planu atu kontinua estudu iha ensinu superior.
“Inan-aman fó ona oportunidade ba hau, no oportunidade ne’e presiza uza ho di’ak, nune’e bele sai oan ne’ebé susesu iha futuru. Durante ne’e hau esforsu aan atu estuda, nune’e inan-aman nafatin tau fiar no konfiansa mai hau. Maske hau ho kondisaun defisiénsia, maibé hau esforsu aan hodi estuda,” nia deklara.
Enkuantu, Domingas de Fatima, inan ida ne’ebé nia oan moris ho kondisaun defisiénsia, hatete katak nia oan iha difikuldade iha movimentu no ko’alia.
Nia hatete katak, nia oan la’o la di’ak tanba nia sorin ida mate, no bainhira atu tuur iha kadeira, presiza ema seluk ajuda foti no tau nia iha kadeira. Agora nia oan iha tinan lima, no tinan oin família sei lori nia ba eskola ho kursu-roda.
“Hau nia oan nee moris mai ho kondisaun hanesan nee kedas. Ko’alia la di’ak no la’o mos la di’ak. Tinan oin ami sei hahu lori nia ba eskola, tanba ami nia uma besik eskola. Ita nia oan nee ita rasik mak tenke lori nia ba eskola,” katak Domingas.
Nune’e, Diretór Nasionál Edukasaun Inkluzivu Asaun Sosial Eskolar, Fernando Soares, husu inan-aman ne’ebé iha oan ho defisiénsia atu lori sira ba eskola ne’ebé besik, hodi bele asesu ba edukasaun.
“Defisiénsia nee mak ita sei mantein hela ho planu ne’ebé ita iha. Tinan nee ita sei atualiza dadus defisiénsia iha nível Pré-eskolar, Tekvok no Sekundáriu Jerál. Agora ita halo planu ona atu hetan aprovasaun,” nia dehan.
Fernando hatutan, Direksaun Nasionál kontinua halo atualizasaun dadus kona-ba estudante ho defisiénsia iha eskola sira, hodi bele hatene númeru no kondisaun estudante ho defisiénsia ne’ebé asesu ona ba edukasaun formal.
Nia dehan, prosesu atualizasaun dadus kona-ba estudante ho defisiénsia agora dadaun sei lao hela.
(jac)
