DILI, STLTIMORLESTE.com – Relasiona ho prosesu subensaun ba projetu resiklajen lixu plastiku neebe mak uluk halao iha Lisibuta Manleuana, kona-ba rai no osan neebe arguidu Jose Deolindo Ximenes simu hodi implementa projetu nee, too ikus mai iha konflitu ba rai projetu la lao, iha tinan 2016 no 2017.
Prosesu nee Ministeriu Publiku akuza arguidu nain tolu, no ikus mai desizaun primera instansia kondena Eis Ministru MKIA, Constansio Pinto prizaun tinan 6, Diretor Jeral MKIA, Antonio da Costa prizaun tinan 5 no Jose Deolindo Ximenes prizaun tinan 4 fulan 10, no selu fali osan sira neebe mak simu husi estadu hodi halo projetu too ikus mai la ezekuta.
Tanba nee defeza husi arguidu sira nian la konkorda hodi tama rekursu ba iha Tribunal Rekursu, no ikus mai Tribunal Rekursu desidi atu halo fali julgamentu foun.
Tuir Advogadu Pribadu, Timotio de Deus katak, prosesu ho Nuc 0050/18 pgcc husi parte defeza halo rekursu kontra desizaun Tribunal Primera Instansia Dili nian, no Tribunal Rekursu hasai ona nia desizaun iha 20 fulan Junhu 2024, no defeza husi Constansio Pinto nian simu iha loron 21 fulan Junhu 2024.
“Iha desizaun ida nee Tribunal Rekursu haree katak, julgamentu neebe Tribunal Primera Instansia halo seidauk sufisiente, tanba iha faktus lubuk ida mak Tribunal Rekursu seidauk halao julgamentu ho diak, hodi desidi katak faktus sira nee provadu ka la provadu,” dehan Timotio ba jornalista sira iha Tribunal Dili, Tersa (19/11/2024).
Nia hatutan, prosesu ida nee iha arguidu nain 3 no defeza nain 3 hatoo hotu iha sira nia defeza, maibe Tribunal Primera Instansia la konsidera iha sira nia desizaun. No iha faktus lubuk ida mak Tribunal Rekursu husu atu Tribunal neebe hanesan no Koletivu neebe hanesan atu halo julgamentu foun, hodi halo apresiasaun ba faktus sira neebe mak Ministeriu Publiku akuza ba arguidu sira, provadu ka la provadu.
Laos deit faktus neebe MP akuza ba arguidu sira, haree mos faktus sira neebe alega husi Defeza, Tribunal neebe halo julgamentu ba prosesu nee, obrigatoriu tenke halo apresiasaun faktus sira nee provadu ka la provadu.
Tanba Tribunal Rekursu anula desizaun Tribunal Primera Instansia nian nee Tribunal Rekursu kordena mos atu halo eleminasaun, hasai tiha parte balu neebe iha kontraditoriu, no defeza haree katak iha parte balu neebe Tribunal Primera Instansia desidi iha kontradisaun entre faktus ida ba faktus seluk. Tribunal Rekursu husu atu Koletivu neebe hanesan, halo julgamentu foun atu hamutuk hasai tiha parte neebe mak kontraditoriu, Tribunal Rekursu ordena laos altera deit desizaun nee, maibe halo julgamentu foun ba prosesu nee, hodi halo apresiasaun ba faktus neebe imputa ba arguidu sira.
Parte defeza konsidera sira nia kliente inusente, MP akuza faktus lubuk ida ba arguidu sira, maibe parte defeza hatoo sira nia defeza, no parte Tribunal la dun haree faktus ho didiak, nunee faktus lubuk ida mak halo Tribunal Rekursu iha duvidas atu halo desizaun. Tanba nee mak Tribunal Rekursu desidi anula tiha desizaun nee husu atu halo julgamentu foun.
Timotio dehan, antes nee desizaun Primera Instansia nian kondena Eis Ministru MKIA Constansio Pinto prizaun tinan 6, Diretor Jeral MKIA Antonio da Costa prizaun tinan 5 no Jose Deolindo Ximenes prizaun tinan 4 fulan 10, no selu fali osan sira neebe mak simu husi estadu hodi halo projeitu too ikus mai la ezekuta.
Arguidu nain 3 nee MP akuza ho krimi Partisipasaun Ekonomia no Negosiu, no iha alegasaun MP mantein ho akuzasaun husu atu kondena arguidu sira, no selu Indemnizasaun ba estadu, ba osan subensaun neebe mak arguidu Jose Deolindo Ximenes simu, maibe Tribunal Rekursu anula desizaun nee la vale tenke halo desizaun foun, tenke tuir prosesu foun no sei hatoo fali defeza foun alegasaun.
Nunee, Koletivu ba prosesu nee iha Tribunal Dili nian mak Prezidente Juiz Alvaro Freitas, Jose Gonsalves, Arjentino Nunes, Prokuradora Lidia Soares. Kolektivu husi TR nian mak, Juiza Maria Natercia Gusmão.
(ter)
