DILI, STLTIMORLESTE.com – Eis Prezidente Republika Indonezia (RI), Ibu Megawati Soekarnoputri sei vizita Timor Leste (TL) iha fulan Julhu tinan ida nee.
Prezidente Republika, Jose Ramos Horta ba jornalista sira iha Aeroportu Internasional Nicolau Lobato, Komoro, Kuarta nee (03/06/2026) hatete, eis Prezidente Republika Indonezia sei mai Timor Leste iha fulan oin, daudaun nee ekipa avansadu husi indonezia mai ona Timor Leste hodi halo kolaborasaun ba preparasaun.
Prezidente Republika hatete Ibu Megawati atu mai iha fulan Julhu nee ekipa avansa too ona iha Timor aban Prezidente hasoru sira ekipa boot ida para organiza prepara didiak programa vizita Ibu Megawati.
“Nee hanesan omenajen ba nia nuudar Prezidente Indonezia nia mai partisipa iha restaurasaun Indepedensia iha tinan hira nia laran hau sempre enkontru ho senhora Megawati kolabora nia kontinua forsa boot iha indonezia, iha parlamentu nia partidu mak boot nia oan feto mak Prezidente Parlamentu entau konvida nia mai nia simu, eventu nee importante atu hametin relasaun ho Indonezia,” dehan PR Horta.
Karik eis Prezidente Megawati mai Timor Leste iha fulan Junho assuntu prinsipal saida mak sei deskute hamutuk hatan ba kestaun nee Prezidente Republika hatete klaru sei deskute assuntu barak ho Governu maibe Ibu Megawati laos Governu maibe nia prezidente partidu neebe poder boot liu iha indonezia.
“Maibe bele koalia ho nia tanba nia lider nasional ida bele haree saida mak mak bele avansa tan relasaun ho indonezia mais ajenda seidauk iha, ida nee hau husik ba liu liu primeiru Ministru para haree saida mak bele avansa ho partidu PDI sei enkontru ho partidu sira seluk portantu laos deit ho CNRT ho Governu maibe hasoru malu mos ho partidu sira seluk se sira hakarak avontade, ho FRETILIN, PD hola parte ho Governu prepara simu hamutuk, bele ho PLP, KHUNTO se sira iha tempu hakarak bele ajenda Prezidensia fasilita marka enkontru,” katak PR Horta.
Fulan kotuk mos Prezidente Republika (PR) Jose Ramos Horta halo enkontru ho eis Prezidente Republika Indonezia, Megawati Soekarnoputri hodi hametin relasaun estratejika Timor Leste ho Republika Indonezia.
Prezidente Republika Jose Ramos Horta halao enkontru ho eis Prezidente Indonezia, Megawati Sukarnoputri, iha Abu Dhabi, hodi hatudu ligasaun istorika no pesoal neebe klean entre nasaun rua nee.
Prezidente enfatiza katak nuudar líder PDI-P nian, partidu polítiku boot liu iha Indonezia, Megawati sai parseiru fundamental ida hodi mantein rekonsiliasaun no fraternidade neebe define ona relasaun entre nasaun rua nee dezde restaurasaun independensia.
(eme)
