DILI, STLTIMORLESTE.com – Ekipa Konjunta kompostu husi Sekretariu Estadu Asuntu Topinimia no Organizasaun Urbana (SEATOU), Autoridade Munisipiu Dili, Diresaun Nasional Transporte Terestre (DNTT), Polisia Nasional Timor Leste (PNTL) no FALINTIL-Forsa Defeza Timor Leste (F-FDTL) hahu semana nee sei halo operasaun ba transporte no negosiu sira neebe okupa espasu publiku sira iha Kapital Dili.
Operasaun nee ekipa konjunta halo bazeia ba Dekretu-Lei 03/2024, “Higiene no Ordem Publika” Decreto-Lei N.° 33/2025 de 15 de Outubro Primeira Alterasaun ao Dekretu-Lei n.° 3/2017, de 22 de Marsu “Regime das Zonas de Estacionamento de Durasaun Limitada”.
Dekretu-Lei Lei N.° 1/2025 de 12 de Março, “Medidas de Tutela da Legalidade Urbanistika” Dekretu-Lei n° 6/2003 de 3 de Abril, “Kodigu de Estrada” nomos Dekretu-Lei N.° 9 /2022 de 24 de Fevereiro, “Regime Juridiku da Edifikasaun e Urbanizasaun.
Sekretariu Estadu Asuntu Topinimia no Organizasaun Urbana (SEATOU), Germano Santa Brites hatete, operasaun neebe ekipa konjunta halo nee ho objetivu atu garante ema hotu neebe uza espasu publiku sira atu lao tuir regras neebe iha.
“Husi padraun legal sira nee mak hotu mak loke dalan ba ekipa konjunta hodi halo servisu no organiza sidade atu tau regra orden publiku ba iha sosiedade nia leet, atu nunee sosiedade bele moris tuir regra,” hatete SEATOU liu husi Konferensia Imprensa neebe realiza iha Edifisiu MAE, Kaikoli, Kuarta (22/07/2026).
Governante afirma, ekipa konjunta sei aviju no tau sinais ba estasionamentu ba iha fatin hotu-hotu iha kapital Dili nee tuir dekretu lei numeru 3 kona-ba rejime jona estasionamentu de durasaun limita.
Nia hatutan, ekipa konjunta sei foti medida rigorozu ba komunidade sira neebe la kumpri no uza espasu publiku sai hanesan parazen kareta iha trotoar leten no dalan sira neebe DNTT tau ona sinais.
“Tan nee bainhira ekipa konjunta halo operasaun mak hetan hahalok sira hanesan nee, ou para kareta motor la tuir orden neebe mak ekipa konjunta sei foti medida rigorozu hodi prende ou kore sapa matrikula kareta nian atu nunee bele kumpri regras neebe ekipa tau,” alerta nia.
Nia dehan, ekipa konjunta mos sei foti hasoru komunidade sira neebe toka muzika iha tempu kalan, barullu no la fo tempu ba ema seluk atu deskansa.
Nia sublina, Ekipa Konjunta husu la autoriza vendedores ambulante sira atu uza trotoar sira hodi faan sasan, tanba trotoar espasu ba ema atu lao laos uza hodi halo atividade negosiu sira liu-liu iha area Ponte BJ, Habibie ba to Ponte Kuluhun nomos to terminal Bedois Kamea, kampung Alor, Kampung Baru, Bairo Pite, Fatuhada inklui fatin seluk.
Nia husu mos komunidade sira atu asegura animal sira hanesan asu iha uma, labele lao livre iha estrada laran, bainhira hakarak hakiak animal liu-liu hanesan fahi tenki hakiak iha fatin neebe dok husi sidade, nunee labele dois ba komunidade sira seluk.
Entretantu ezekutivu nee mos husu emprezariu Timoroan no estranjeiru sira neebe loke loja atu kria rasik estasionamentu iha loja oin no kria fatin lisu fatin rasik, no lisu neebe iha tenki lori rasik ba soe Tibar, fatin neebe mak governu prepara tiha ona.
(alb)
