BAUKAU, STLTIMORLESTE.com – Ekipa konjunta husi Autoridade Munisipiu Baukau sei la sobu baraka ka fatin negosiu neebe pertense ba Funu Nain FALINTIL Libertasaun Nasional, Clementino Cabral “Mautidi Aliansa” iha Merkadu Vila Nova.
Tuir informasaun neebe STL asesu katak, total negosiante husi Merkadu Vila Antiga no Vila Nova neebe Autoridade Munisipiu Baukau rejistu hamutuk 879 kompostu tipu negosiu faan roupa obralan 148, roupa loja 125, faan sapatu 87, sembako 146, sasan dapur 54, kulsaun 10, alfayate 14, faan sanan rai 3, Tais Timor 7, faan telefone 15, baber shop 5, sasan eletroniku 9, kosmetik 13, faan osan mean 1, faan pulsa EDTL 2, faan aimoruk ba Agrikultura nian 1, Farmasia 1, faan naan karau no seluk tan 10, faan ikan 23, Produtu lokal 200,no mini restorante 7 neebe atu muda ba merkadu foun Tuanau.
Husi negosiante hirak nee, Autoridade Munisipiu Baukau liu husi ekipa konjunta marka orariu iha loron 19-23 Novembru 2024 hahu sobu negosiante sira nia baraka husi merkadu tuan Vila Nova.
Nomos iha loron 04 Dezembru nee kontinua ezekuta servisu sobu negosiante sira nia baraka iha merkadu Vila Antiga inklui negosiante okupa espasu publiku sira nia baraka husi Vila Antiga too Vila Nova.
Nunee iha loron 09 Dezembru nee, liu husi ekipa konjunta kontinua halo limpeza ba fatin baraka neebe sobu ona, liu-liu iha merkadu Vila Nova.
Tuir ekipa konjunta ofisial tekniku husi EDTL, Justino Barbosa Pereira katak, tuir orientasaun servisu ba ekipa konjunta katak, bainhira parte EDTL desliga tiha koneksaun eletrisidade ba fatin negosiu ka baraka mak, hafoin ekipa seluk halao servisu sobu.
Nunee iha loron 09 Dezembru nee kedas parte EDTL desliga ona koneksaun eletrisidade ba iha baraka ka fatin negosiu refere, maibe too ohin loron ekipa konjunta rasik seidauk bele sobu.
“Servisu kontinua halao, horiseik ita reuni ho Prezidente Autoridade ho nia ekipa tomak, autor ho nia uma nee rasik hela mesak iha neeba, mais restu ita kontinua sobu,” hateten Komandante Komando Polisia Munisipiu Baukau, Superintendente Xefe Polisia Antonio Maria De Sa ba jornalista sira iha Vila Nova, Kuarta (11/12/2024).
Nia katak, mezmu ekipa konjunta nafatin sobu fatin negosiu sira nia baraka iha merkadu Vila Nova, maibe fatin pertese ba “Mautidin Aliansa” ekipa sei la sobu, tanba iha sasan balun neebe presiza atu asegura.
(EST 2)
