DILI, STLTIMORLESTE.com – Ekipa Prezidensia Republika (PR) kolleita hare neebe durante nee apoiu husi Prezidente Republikan Jose Ramos Horta iha Munisipiu Viqueque.
Ekipa Prezidensia Republika liu husi Unidade Servisu Sosiedade Sivíl no Apoiu Sosial (SSAS), liderada husi Koordenadora SSAS, Teresa dos Santos Ximenes, partisipa iha serimonia “Kolleta Hare, neebe halao iha Postu Administrativu Beaco, Suku Maluro, Munisípiu Viqueque foin lalais.
Iha biban nee Koordenadora Unidade Servisu Sosiedade Sivíl no Apoiu Sosial (SSAS), Teresa dos Santos Ximenes b STL, Segunda (24/08/2026) hatete, ekipa ba kolleita hare neebe durante nee apoiu husi Prezidente Republikan Jose Ramos Horta iha Munisipiu Viqueque.
“Liafuan badak husi hau lori mensajen reprezenta PR hatoo parabens ba ama no apa sira neebe badinas halao servisu kuda hare too ohin loron ita kolleita too 65 toneladas. Badinas nafatin atu kontinua halao servisu ida nee hodi bele ajuda familia nia nesesidade sira no hare oan sira ba eskola,” dehan Koordenadora.
Atividade nee organiza husi juventude kreativu AMBX, hamutuk ho autoridade lokal sira ho objetivu atu haree direta no fo apresiasaun ba rezultadu husi inisiativa komunidade agrikultor sira neebe hahu ona iha tinan kotuk.
Serimonia nee kontinua husi atividade “Lansamentu Kuda Hare”, neebe halao iha iha tinan kotuk neebe lansa diretamente husi Prezidente Republika, Jose Ramos Horta. Husi natar neebe hetan apoiu liu husi inisiativa nee, maka komunidade sira hetan rezultadu kolleta iha tinan ida nee bele atinji too tonelada-65, husi area agrikula natar ho luan hamutuk hektare-13, ho produtividade mediu aproxima too tonelada-5 kada hektare.
Iha biban nee Koordenador Grupu Agrikultura hatoo agradesimentu ba Prezidensia Republika tanba bele fo apoiu neebe signifikativu tebes ba sira hodi bele hetan rezultadu kolleta neebe atinji too kedas tonelada-65.
Serimonia “Kolleta Hare” nee hetan partisipasaun husi Prezidente Autoridade Munisípiu Viqueque (PAM), Diretor Agrikultura Munisípiu, PNDS, Koordenador AMBX, Xefe Suku, Grupu Agrikultor no komunidade lokal sira.
Atividade nee konsidera hanesan ezemplu ida kona-ba importansia kolaborasaun entre instituisaun Estadu, juventude, autoridade lokal no komunidade iha dezenvolvimentu agrikultura no hasae produsaun ai-han iha nível lokal.
(eme)
