ZUMALAI, STLTIMORLESTE.com – Instituto Ciências da Saúde (ICS) asegura katak ekipamentu laboratóriu no prátika ne’ebé iha atualmente sufisiente atu suporta atividade prátika estudante sira nian, hodi estudante sira la simu teoria de’it maibé bele aplika diretamente iha prátika.
Reitor ICS, Leão Borges hato’o informasaun ne’e ba STL Segunda-feira (05/10/2026), no dehan estudante sira husi departamentu sira iha ICS kontinua hala’o atividade prátika tuir oráriu no área estudu ida-idak.
“Ami-nia ekipamentu laboratóriu nian sufisiente ba ami-nia estudante sira. Ekipamentu prátika nian sufisiente ona, tanba estudante labele simu de’it teoria, maibé presiza hala’o prátika,” nia dehan.
Nia hatutan katak, estudante sira husi departamentu ida-idak hala’o prátika tuir área estudu ne’ebé sira hili, depois de simu materiál teóriku husi dosente sira.
“Kona-ba estudante sira hala’o prátika, depende ba oráriu. Estudante sira tenke halo duni prátika. Teoria nian estudante hotu simu, depois mak hala’o prátika tuir departamentu ne’ebé eziste iha ICS,” nia informa.
Leão Borges subliña katak, oportunidade atu halo prátika importante ba estudante sira, tanba bele ajuda sira kompriende diak liután matéria ne’ebé sira aprende no prepara sira atu aplika koñesimentu bainhira remata estudu no tama iha mundu servisu.
“Ita-nia estudante sira la’ós simu de’it teoria husi ita-nia dosente sira. Depois de simu teoria, sira mos hala’o prátika, atu bele kompriende diak ba área ne’ebé sira hili,” tenik nia.
Nia hatete katak, atividade prátika envolve área sira hanesan parteira, enfermagem, farmásia, nutrisaun no área saúde seluk.
Enkuantu ne’e, estudante ICS, Marciana de Jesus dehan, maski foin tama iha ICS no aula foin hahú, estudante sira presiza partisipa iha atividade prátika no la’ós simu teoria de’it.
“Ami hala’o prátika tuir ami ida-idak-nia departamentu ne’ebé iha ona. Ami-nia ekipamentu prátika nian iha hela,” dehan Marciana.
Estudante husi departamentu Enfermagem, Antonio da Costa, mos dehan estudante área saúde presiza kombina teoria ho prátika atu bele kompriende diak matéria no prepara an ba servisu iha futuru.
Nia dehan, estudante sira la bele depende de’it ba teoria, maibé presiza halo prátika tuir área estudu ida-idak.
(car)
