DILI, STLTIMORLESTE.com – Maski Eleisaun Prezidensial 2027 sei dook hela, maibe movimentu “Kampanha Subar Subar” ho distribuisaun pakote ai-haan baziku foos, supermi no mina hahu beraksi ka sirkula ona iha baze. Observador Politika sira deskonfia ida nee mak estratejia sosa votu, neebe ameasa kualidade eleisaun nian. Demokrasia neebe seidauk maduru nee, daudaun nee enfrenta ameasa husi kultura dependensia neebe kandidata sira kria rasik.
Movimentu foos, supermi no mina nee hanesan taktika sistematiku. Kandidatu sira hatene bainhira povu moris iha susar fo ai-haan nee nuudar dalan efikas atu sosa votu. Ida nee mak perigu tanba eleisaun sai laos ona kompetisaun programa, maibe kompetisaun rekursu finanseiru.
Tanba tuir Observador Politika, Manuel Martins Soares katak, movimentu distribuisaun sasan nee nuudar estratejia sosa votu. Iha tempu neebe kbiit laek povu nian sae moeda troka fatin, kandidatu sira hanorin mentalidade hein sasan. Povu neebe simu aihan nee, ikus mai lakon kbiit moral atu kolia makas ka kritika kandidatu sira nia programa politiku wainhira sira manan.
“Pratika nee sei lori konsekuensia grave ba estadu, tanba kandidatu neebe iha osan barak deit mak bele kompete, ema neebe ita haree iha kualidade maibe laiha rekursu finansial sei lakon oportunidade. Nunee mos ita nia povu sei sente taka ibun ka iha obrigasaun atu vota ba kandidatu nee laiha programa neebe diak ba nasaun,” hatete Manuel ba STL, iha Kaikoli, Dili, Kuarta (29/04/2026).
Manuel mos fo hanoin katak, edukasaun sivika tenke sai prioridade antes tama ba kampanha ofisial. Povu tenke hatene katak votu neebe fo iha 2027 sei determina futuru nasaun nian. Foos, supermi no mina nee ajuda deit ba loron ida ka rua, maibe politika neebe bosok bele estraga futur ba tinan barak.
Hanesan sidadaun tenke sai observador iha fatin hotu. Labele husik politika sosa votu nee domina rai laran. Eleisaun neebe kualidade mai husi eleitor neebe kritiku, laos eleitor neebe taka ibun ho pakote aihan hanesan foos, supermi, mina no seluk tan.
“Maski seidauk tama ba kampanha ofisial, ami husu ba Komisaun Nasional Eleisaun (CNE) atu kontrola movimentu sira neebe uza fundu privadu ka publiku hodi halao kampanha subar subar,” hatete Observsdor Politika nee.
Iha parte ketak, Akademista UNPAZ, Orlando de Jesus alerta katak, kampanha foos, supermi ho mina nee laos dalan atu ajuda povu, maibe nee mak distorsaun demokratiku. Tuir nia pratika nee impede kualidade debate politika neebe bazeia ba programa. ”Ita nia demokrasia seidauk metin, tanba kandidata sira uza kbiit laek povu nian hodi sosa votu, hanesan agora dadaun balu tun ba baze fahe ona foos, supermi, mina no seluk tan,” dehan nia.
(car)
