BAUCAU, STLTIMORLESTE.com – Eleitores balu la satisfas ho atendimentu Sekretariadu Tekniku Administrasaun Eleitoral (STAE) Munisipiu Baucau, liu-liu kona-ba sistema biometriku.
Iha prosesu atendimentu kartaun eleitoral biometriku, prezensa eleitores besik ema 100, Justiniano Lopes da Costa hatete, sistema biometriku importante atu fasilita no asegura prosesu administrasaun eleitoral, maibe iha prosesu atendimentu lentu, tanba eleitores balu tenke lori sira nia oan neebe idade sei kiik hodi forma linha naruk, maibe la hetan atensaun espesial husi STAE.
“Hau akompanha hau nia oan mai iha nee atu trata kartaun eleitoral, maibe seidauk atende. Hanesan sidadaun hau triste haree atendimentu nee, tanba ohin kedas forma maibe sira la bolu,” hateten fonte nee ba jornalista sira iha resintu STAE Baucau, Kinta (13/08/2026).
Nia husu atu aumenta ekipamentus sira nunee atende eleitores sira ho lais no fasil, tanba prosesu atendimentu iha STAE Baucau nee kuaze lentu, hahu husi inisiu too ohin loron, maibe la atensaun ba situasaun nee.
Hatan ba kestaun nee, Diretor STAE Baucau, Natividade Freitas Guterres hatete, atendimentu STAE nian ba eleitores sira kada loron kontinua lao normal, no loron ida bele atende too eleitores nain 200, maibe rekonhese eleitores sira tenke forma naruk, tanba makina emprimidor ba kartaun iha deit unidade ida, neebe difikulta servisu atendimentu nian.
“Antrian makaas iha liur tanba ita nia makina ida deit, tanba atu emprime sai deit eleitoral ida mos han tempu, tanba bolak balik, entaun sira tenke hein, tanba agora ami bolu tama mai sira tenke foti kedas,” Natividade katak.
Nia komenta, eleitores sira forma linha naruk kauza husi mudansa atendimentu ho maneira bolu naran eleitores tama hasai foto no hein rezultadu foti kedas, nunee eleitores balu hein iha liur kleur, maibe garante sei atende too hotu tuir planu kada loron atende eleitores 200.
“Laos hanesan rumor neebe iha katak ami la hatene halo pedidu, maibe anivel Nasional parte aprovizionamentu iha mudansa entaun ita nia orsamentu sai tarde nunee material too agora tarde, maibe grasa deus material sira iha ona,” Natividade argumentu.
Diretor nee husu eleitores sira atu nafatin kalma hein prosesu sira neebe STAE prepara ona, tanba produsaun kartaun eleitoral biometriku nee ho sistema online no sinkroniza dadus neebe prezisa tempu.
Entretantu, husi inisiu fulan Outubru 2024 too ohin loron, STAE Baucau produs ona kartaun eleitoral biometriku 40,28% husi numeru eleitores rihun 108.
(tom)
