DILI, STLTIMORLESTE.com – Grupu Elite Internasional no influensiador rejional sira partisipa iha Dili International Marathon 2026.
Grupu elite ASEAN+, kontinjente viajen ADF nian no influensiador sira husi Indonezia-Australia sei halai hamutuk ho atleta Timoroan sira iha loron Sabadu, 8 Agostu.
Liu husi Konferensia Imprensa, Kinta (30/07/2026), Sean Borrell, Diretor Eventu ba Dili International Marathon 2026, nuudar mos Komisaun Organizadora ba Dili International Marathon 2026 konfirma envolvimentu neebe boot liu husi elite no influensiador ASEAN+ ba edisaun tinan ida nee, hodi sublina Timor-Leste nia papel neebe sai boot ba beibeik nuudar Prezidente tuir mai ba ASEAN iha rejiaun nee.
Elite internasional sira husi Portugal, Xina, Malazia, Indonezia no Australia inklui kontinjente viajen ema nain-neen husi Forsa Defeza Australia (ADF) sei kompete iha kategoria Maratona no Meia-Maratona, enkuantu kriador konteudu (Content Creator) rejional sira sei amplifika eventu nee iha Sudeste Aziatiku laran tomak no Azia-Pasífiku neebe luan liu.
Elite adisional sira husi Indonezia no Australia kompleta partisipante internasional sira ba kategoria Maratona no Meia-Maratona Feto nian, ho alinamentu final neebe sei konfirma iha períodu ofisial ba levantamentu numeru/bib (5 – 7 Agostu 2026) Rosa Mota nia perfíl no istoria estraordinariu nuudar halai nain distansia naruk mos halo nia sai nuudar halai nain neebe famozu liu iha eventu nee.
Kompete hamutuk ho ekipa nasional Timoroan sira iha loron Sabadu, 8 Agostu 2026, sei iha grupu elite internasional ida neebe reflete deliberadamente reperezentasaun pan-rejional.
Halai-nain nain-rua husi ekipa nasional Republika Popular Xina nian Bangliu Zhang no Jiali Wang sei halo viajen mai Dili atu kompete iha Maratona, ho halai nain elite sira husi Malazia, Indonezia no Australia mak sei kompleta grupu internasional nee.
Kontinjente viajen husi Forsa Defeza Australia (ADF) ho membru nain-neen mos sei konsentra iha Dili hodi partisipa no kompete, hodi hametin ponte entre povu-ba-povu no institusional entre Timor-Leste no parseiru rejional sira.
Laos deit husi grupu elite, Dili International Marathon 2026 sei simu mos grupu kriador konteudu rejional neebe selesionadu, neebe sira-nia audiensia kobre rejiaun tomak. Sira sei fahe dalan korrida nian, ambiente, no ospitalidade Timoroan nian ho sira-nia komunidade hodi halo loron korrida nee sai istoria rejional ida.
Kriador sira sei partisipa iha Fun Run (Halai Ksolok) 5 km no programa neebe hetan akreditasaun mídia nian iha DIM EXPO no Serimonia Entrega Premiu, hamutuk ho kontinjente elite nian.
Loron Sabadu, 8 Agostu estrutura ona atu nunee elite ASEAN+ no kriador rejional sira fahe lina hahu, dalan korrida, no lina xegada hamutuk ho atleta ekipa nasional Timoroan sira — laos deit hodi kompete hasoru sira. Hahu husi tempu halibur nian (muster window) iha tuku 04:45 dader. too apitu serimonial no Serimonia Entrega Premiu iha loraik/kalan, programa loron nee harii ho dalan neebe halai iha dalan hanesan, estasaun bee neebe fahe hamutuk, no momentu lina xegada ida hamutuk iha avenida sentral Dili nian.
“Bainhira halai-nain sira forma iha loron Sabadu, 8 Agostu, ambiente iha avenida Dili nian sei haree hanesan loloos ho saida mak ami hakarak DIM atu haree Timoroan, Xines, Malaziu, Indoneziu, Australianu, Melaneziu, Portuges no belun sira husi rejiaun tomak, halai hamutuk. Ida-nee mak espíritu ASEAN+ neebe ami hakarak Timor-Leste atu lori ba ninia tinan nuudar Prezidente ASEAN iha 2029,” dehan Sean Borrell, Diretor Eventu ba Dili International Marathon 2026.
Dili International Marathon mak eventu halai ho partisipasaun masal neebe prinsipal liu iha Timor-Leste, neebe organiza anualmente besik ba komemorasaun independensia nasional nasaun nian.
Edisaun 2026 sei halao husi loron 4 -8 Agostu 2026 no inklui kategoria Maratona, Meia-Maratona, Paralímpiku (Para-Atleta) 10 km no Fun Run 5 km. Orariu hahu ba loron korrida nian: 05:30 dader -Maratona; 05:45 dader. – Meia-Maratona; 06:00 dader – Para-Atleta 10 km; 07:00 dader.- Fun Run, Tema “Love Our Forests and Wildlife / Hadomi Ita-Nia Ai-laran no Balada Fuik sira.
(eme)
