DILI, STLTIMORLESTE.com – Ema la’o ain iha Dili buka zebra cross la hetan tanba tinta lakon ona, halo sira hakur ho tauk no la seguru.
Observasaun iha terenu hatudu markasaun mutin iha dalan barak lakon kores ona, la moos hanesan uluk no difisil motorista atu haree husi dook.
Kondisaun ne’e la’os de’it kestaun furak sidade nian, maibe hatudu kualidade tinta ne’ebe uza la tuir padraun tekniku infraestrutura nian.
Bainhira marka lakon, funsaun zebra cross mos lakon, nune’e labarik eskola, foinsa’e no katuas-ferik hasoru risku boot ba asidente.
Iha tempu kalan no udan boot, risku sa’e makaas tanba naroman menus no vista kondutor nian la klaru atu trava lalais.
Situasaun ne’e hatudu falta monitorizasaun no manutensaun regular husi Ministériu Obras Públikas no DNTT ba seguransa rodoviaria.
Komunidade Luciano de Ataujo lamenta no kestiona, tan sa mak tinta lakon lalais maski foin pinta iha tempu badak nia klaran.
“Hanesan komunidade ami lamenta tebes kualidade tinta ne’e, foin uza maibe lakon lalais, labele gasta orsamentu estadu arbiru de’it,” dehan Luciano ba STL, iha Kampung Alor, Dili, Tersa (30/09/2029).
Luciano husu ba Governu atu labele husik marka sira la moos, tanba loron-loron labarik barak hakur iha ne’eba ba eskola.
Iha parte ketak Akademista husi UNTL, Justino Soares, komentariu katak tinta ne’ebe uza agora la tahan ba klima, tanba ne’e mak lakon lalais no la tuir padraun.
“Tinta sinál tráfegu tenke tuir padraun tekniku atu dura naruk, ezekutór tenke responsabiliza kualidade hodi proteje povu nia vida.”dehan nia.
Akademista ne’e hatutan tan, se Governu hadia ho tinta diak, sei proteje ema la’o ain no hanorin motorista atu respeita fatin hakur nian.
(car)
