Ema Nain 2 Hetan Ta’a iha Suku Afaloikai Baguia

DILI, STLTIMORLESTE.com – Deskonfia ema nain 2 hetan ta’a husi maluk ida ho katana iha Aldeia Okilari, Suku Afaloikai, Postu Administrativu Baukau, Munisipiu Baukau.

Xefe Suku Afaloikai Jermano João Baptista aprezenta, insidente nee akontese iha parte madrugada 04:00 loron 22 Abril nee, iha neebe sidadaun mane nain 3 hemu tua iha Aldeia refere, maibe ho diskusaun no goza malu.

Liu husi diskusaun no goza malu neebe iha halo sidadaun ida seluk lakon razaun hodi hasoru sidadaun nain 2 refere, tanba nee deskonfia ho katana taa sidadaun nain 2 refere rezulta kanek grave iha parte ain no liman.

“Ida kanek iha liman loos ida kanek iha ain loos parte klor leten nee, kanek nee grave, tanba nee ohin labele halo atendimentu iha Baguia lori liu ba Baukau,” hateten Xefe Suku Afaloikai Jermano João Baptista liu husi telefone, Kuarta (22/04/2026).

Nia sublina, hafoin insidente refere akontese, parte pesoal saude sira husi Sentru Saude Baguia inklui too kedas fatin akontesementu hodi evakua vitima nain 2 refere ba Sentru Saude Baguia atu fo tratamentu, maibe la konsege, tanba vitima nain 2 hetan kanek grave, nunee transporta kedas ba Hospital Rejional Eduardo Ximenes (HoREX) Baukau atu hetan tratamentu ba kanek refere.

Enkuantu sidadaun neebe deskonfia taa sidadaun nain 2 refere sei hases aan husi parte Autoridade Suku no Polisia Eskuadra Postu Baguia.

Entretantu too notisia nee publika, STL seidauk hetan komfirmasaun husi Autoridade seguransa Munisipiu Baukau.

(tom)